Արցախում ականի վրա պայթելու հետևանքով ավելի քան 140 ադրբեջանցի է տուժել, 27-ը՝ մահացել

Արցախի գրավյալ տարածքներում ականի վրա պայթելու հետևանքով 2020 թվականի նոյեմբերի 9-ի եռակողմ հայտատարության ստորագրումից հետո Ադրբեջանի 27 քաղաքացի է մահացել։  Այս մասին հայտնել է Ադրբեջանի Մարդու իրավունքների պաշտպան Սաբինա Ալիևան։

«Պատերազմի ավարտից հետո Ադրբեջանի տասնյակ զինծառայողներ և խաղաղ բնակիչներ են մահացել ականի վրա պայթելու հետևանքով։ Հակամարտության ավարտից հետո ավելի քան 140 մարդ է տուժել ականներից ու այլ պայթուցիկ սարքերից, 27 մարդ էլ մահացել է ականի վրա պայթյունից»,- ասվում է Ալիևայի հայտարարության մեջ։

Ավելի վաղ էլ Ադբեջանի Գլխավոր դատախազությունն էր տվյալներ ներկայացրել Արցախում ականի վրա պայթելու հետևանքով մահացած ու վիրավորված ադրբեջանցիների մասին։ Ըստ այդ տվյալների՝  2020թ. նոյեմբերի 9-ից մինչև օրս ականի վրա պայթելու հետևանքով մահացել է 27 ադրբեջանցի՝ 7 զինծառայող ու 20 քաղաքացիական անձ, վիրավորվել է 115-ը՝ 86 զինծառայող ու 29 քաղաքացիական անձ։ Ընդհանուր առմամբ, տուժել է 142 անձ։

Հավելենք, որ հիմնականում ադրբեջանցիների մեծ մասը փորձում է թափանցել Արցախի գրավյալ տարածքներ թալանի նպատակով։ Որոշ տվյալներով՝ շատ դեպքերում դա կազմակերպվում է ոստիկանապետերի ու գործադիր իշխանության ներկայացուցիչների կողմից, որոնք մարդկանց տարբեր խմբերի ուղարկում են ականապատ տարածքներ՝ վտանգելով նրանց կյանքը։ Բնակիչները ևս փաստում են, որ շատերն Արցախի գրավյալ տարածքներ գնում են թալանի նպատակով։

Էմմա Չոբանյան