24.04.2026 | 13:55
Ադրբեջանի ԱԳՆ-ն «դատապարտել» է Երևանում Թուրքիայի դրոշի այրումը
Բաքուն հայկական Շուշին նախապատրաստում է Էրդողանի այցին
Քաղաքականություն
14.06.2021 | 13:51
Ադրբեջանում ակտիվորեն նախապատրաստվում են Թուրքիայի նախագահի այցին։ Արդեն հայտնի են նաև Էրդողանի այցի օրակարգի մանրամասները։
Տեղական լրատվամիջոցների հաղորդմամբ՝ Բելգիա կատարած այցից հետո Թուրքիայի նախագահը հունիսի 15-16-ը պաշտոնական այցով լինելու է Ադրբեջանում։ Այդ ընթացքում Ադրբեջանի կողմից օկուպացված հայկական Շուշի քաղաքում տեղի են ունենալու երկկողմ հանդիպումներ, քննարկվելու են թուրք-ադրբեջանական հարաբերությունների բոլոր ասպեկտները և դրանց խորացման հնարավորությունները։ Այցի ընթացքում Էրդողանը հունիսի 16-ին ելութ է ունենալու նաև Ադրբեջանի Միլլի Մեջլիսում։ Ի դեպ, այս պատճառով ադրբեջանցի պատգամավորներն այսօր և վաղը կորոնավիրուսի թեստ են հանձնելու։
Նշվում է նաև, որ Ռեջեփ Թայիփ Էրդողանն ու Իլհամ Ալիևը հունիսի 16-ին Ֆուտբոլի Եվրոպայի առաջնության շրջանակում ներկա են գտնվելու Բաքվում կայանալիք Թուրքիայի և Ուելսի հավաքականների հանդիպմանը։
Հավելենք, որ Էրդողանն անձամբ արդեն մի քանի անգամ ազդարարել է հայկական Շուշի կատարելիք այցի մասին՝ նշելով, որ այնտեղ նաև թուրք-ադրբեջանական նոր համաձայնագիր է ստորագրվելու։
«Առաջին հերթին կուղևորվենք Ֆիզուլի, այնուհետ իմ եղբոր՝ Իլհամ Ալիևի հետ կմեկնենք Շուշի և համաձայնագիր կստորագրենք։ Խոսքը Ադրբեջանի և Թուրքիայի միջև մեծածավալ փաստաթղթի մասին է»,- ասել էր Էրդողանը՝ չմանրամասնելով, սակայն, թե ինչ ոլորտի է առնչվելու համաձայնագիրը։
Ադրբեջան կատարելիք այցին Էրդողանն անդրադարձել է նաև նախօրեին՝ Բրյուսել մեկնելուց առաջ, որտեղ մասնակցելու է ՆԱՏՕ-ի գագաթնաժողովին։
Մինչ այդ, Ադրբեջանում ակտիվ նախապատրաստական աշխատանքներ են ընթանում, հատկապես՝ հայկական Շուշիում։ Նախօրեին Շուշի է այցելել Ադրբեջանում Թուրքիայի նորանշանակ դեսպան Ջահիթ Բաղչին։ Այս մասին նա գրառումներ է արել թվիթերյան իր էջում ու լուսանկարներ հրապարակել։
«Մենք գտնվում են Շուշիում՝ մեր նախագահի այցից առաջ ուսումնասիրության համար։ Այսօր մենք շնչեցինք ազատ Ղարաբաղի օդը»,- գրել է Թուրքիայի դեսպանը։
Համացանցում տարածվող տեղեկությունների համաձայն՝ Շուշիում նաև աննախադեպ անվտանգության միջոցառումներ են իրականացվում։ Ի դեպ՝ դեռևս պարզ չէ, թեինչպես են Էրդողանն ու Ալիևը հասնելու Շուշի։ Վերջին օրերին էլ Թուրքիայից Ադրբեջան 11 ռազմական ինքնաթիռ է ժամանել, ըստ երևույթին, անվտանգային խնդիրների լուծման համար։
Էմմա Չոբանյան
