30.06.2026 | 15:30
Հայաստանի և Ադրբեջանի միջև Հարավսլավիայի մոդելով անհետ կորածների տվյալների բազա կստեղծվի․ ICMP-ի գլխավոր տնօրեն
Էրդողանը հայտարարել է Շուշիում «իր եղբոր՝ Ալիևի հետ» մեծածավալ համաձայնագիր ստորագրելու մասին
Քաղաքականություն
11.06.2021 | 17:45
Թուրքիայի նախագահ Ռեջեփ Թայիփ Էրդողանը ուրբաթօրյա աղոթքից հետո լրագրողների հետ զրույցում ևս մեկ անգամ հայտարարել է, որ հաջորդ շաբաթ պատրաստվում է այցելել Ադրբեջան, ինչպես նաև օկուպացված Շուշի։ Այս մասին հաղորդում է «Անադոլու» գործակալությունը։
«Առաջին հերթին կուղևորվենք Ֆիզուլի, այնուհետ իմ եղբոր՝ Իլհամ Ալիևի հետ կմեկնենք Շուշի և համաձայնագիր կստորագրենք։ Խոսքը Ադրբեջանի և Թուրքիայի միջև մեծածավալ փաստաթղթի մասին է»,- ասել է Էրդողանը՝ չմանրամասնելով, սակայն, թե ինչ ոլորտի է առնչվելու համաձայնագիրը։
Նա նաև խոսել է Արցախի գրավյալ տարածքներում ականազերծման աշխատանքների մասին։
«Մենք կդիմենք բոլոր կողմերին, հատկապես՝ նրանց, որոնք կապ ունեն ականների ու չպայթած զինամթերքի թեմային։ Կոչ ենք անում աջակցել շուտափույթ ականազերծման գործընթացին»,- ասել է Թուրքիայի նախագահը։
Ավելի վաղ Էրդողանը հայտարարել էր, որ հունիսի 15-ին իր ադրբեջանցի գործընկեր Իլհամ Ալիևի հետ բանակցություններ է անցկացնելու Լեռնային Ղարաբաղում, ընտանեկան այց է կատարելու Շուշի։ Հենց այստեղ էլ տեղի են ունենալու պաշտոնական հանդիպումներ ու տարբեր միջոցառուներ։
Նշենք, որ Թուրքիայի նախագահի այցն Ադրբեջան նախատեսված է հունիսի 14-16-ը, որի շրջանակում Էրդողանն Ալիևի հետ հունիսի 16-ին ներկա է գտնվելու նաև ֆուտբոլի 2020 թվականի Եվրոպայի առաջնության՝ Թուրքիայի և Ուելսի հավաքականների հանդիպմանը։
Էմմա Չոբանյան
