Ո՛չ թանկարժեք գույք, ո՛չ ավտոմեքենա, ի՞նչ է հայտարարագրել Քոչարյանը

Factor.am-ը շարունակում է արտահերթ խորհրդարանական ընտրություններին մասնակցող կուսակցությունների և կուսակցությունների դաշինքների ընտրական ցուցակի առաջին երեք տեղերը զբաղեցնող անձանց գույքի և եկամուտների մասին հայտարարագրերը ներկայացնող շարքը։

Հայաստանի Հանրապետության երկրորդ նախագահ Ռոբերտ Քոչարյանը, որն արտահերթ խորհրդարանական ընտրություններին մասնակցում է «Հայաստան» դաշինքով, հայտարարագրել է իր գույքն ու եկամուտները: Ներկայացված տվյալներից պարզ է դառնում, որ Քոչարյանն ունի երկու տուն: Մեկը 195.83 քմ մակերեսով բնակարան է Ստեփանակերտում, մյուսը` 1715.7 քմ մակերեսով բնակելի տուն Երևանի Իսակովի պողոտայում:

Որպես եկամուտ` Ռոբերտ Քոչարյանը ներկայացրել է 28 մլն 915 հզր դրամի կորպորատիվ պարտատոմս, 78 հզր 155 դոլարի ավանդ: Հայտարարագրած է նաև մեկ տարվա ընթացքում 199 հզր 300 դոլարի վարձատրությունը ռուսական «Սիստեմա» ԲՖԿ-ից․ այս ընկերությունում Քոչարյանն ունի 0,0306% բաժնեմաս: Հայտարարագիրը ներկայացնելու օրվա դրությամբ Քոչարյանն ունեցել է 980 մլն դրամ և 1 մլն 927 հազար դոլար:

Ուշագրավ է, որ Ռոբերտ Քոչարյանը չի հայտարարագրել ո՛չ թանկարժեք գույք, ո՛չ էլ ավտոմեքենա:

Հիշեցնենք, որ, ըստ գործող օրենքի, թանկարժեք է համարվում 8 մլն դրամից ավելի արժեքով շարժական գույքը։

ՀՀ երկրորդ նախագահի գույքի և եկամուտների մասին տվյալներն ավելի համեստ են նրա որդու` Լևոն Քոչարյանի հայտարարագրի համեմատ: Հիշեցնենք, որ Լևոն Քոչարյանը «Հայաստան» դաշինքի ցուցակում 50-րդն է։

Լևոն Քոչարյանը հայտարարագրել է 3 անշարժ գույք` 226 քմ մակերեսով բնակարան և 20 քմ մակերեսով ավտոտնակ մայրաքաղաքի Աբովյան փողոցում, ինչպես նաև 203 քմ գրասենյակային տարածք՝ Վազգեն Սարգսյան փողոցում:

Երկրորդ նախագահի որդին հայտարարագրել է 2 ավտոմեքենա` «Toyota RAV4 2.5» և «Toyota Camry 3.5P»: Որպես եկամուտ նրա հայտարարագրում նշված է 604 մլն 200 հզր դրամ շահույթ` ստացված «Նաիրի Ինշուրանս»-ից, 14 մլն 997 հզր 775 դրամ` «Մենեջմենթ Սիսթեմզ Ինթերնեյշնլ»-ի վարձակալությունից և 17 մլն 694 հազար դրամ «Նաիրի Ինշուրանս»-ից՝ որպես աշխատավարձ:

Հայտարարագիրը ներկայացնելու օրվա դրությամբ Լևոն Քոչարյանն ունեցել է 161 մլն 280 հզր 640 դրամ և 395 հզր 459 դոլար: