09.06.2026 | 14:35
Պուտինը կշնորհավորի՞ Փաշինյանին․ մանրամասնում է Կրեմլի խոսնակը
Պատրաստվեք քաղաքացիական վրեժի. Նիկոլ Փաշինյան. ՏԵՍԱՆՅՈՒԹ
Քաղաքականություն
08.06.2021 | 14:13
Ընտրություններից հետո քաղաքական ու քաղաքացիական վենդետաներ են լինելու, կադրային ջարդ է իրականացվելու պետական կառավարման համակարգում: Այս մասին այսօր նախընտրական հանդիպման ժամանակ հայտարարեց վարչապետի պաշտոնակատար Նիկոլ Փաշինյանը։
«2018-ի հեղափոխությունից առաջ ասել եմ, որ կադրային ջարդեր չեն լինելու, հիմա ուզում եմ ասել, որ կադրային ջարդեր լինելու են, և ջարդի են ենթարկվելու այն պաշտոնյաները, որոնք 2018-ից հետո հեղափոխության տված հնարավորություններից օգտվելով՝ ծվարել են ժողովրդի իշխանության միջանցքներում և այս ողջ ընթացքում կատարել են «տրոյական ձիու» դերակատարում:
Այո՛, տվե՛ք այդ կադրային ջարդն անելու մանդատը, և մենք բոլոր «տրոյական ձիերին» դուրս կշպրտենք ՀՀ պետական կառավարման համակարգից։
Ես ասել էի, որ վենդետաներ չեն լինելու։ Էսօր ինձ տարբեր նախընտրական հավաքներից ուղարկում են լուսանկարներ, որ մարդիկ էդ հավաքներին կանգնած են ծուռ վզերով, ոնց որ թոկը վիզը գցած տարած լինեն։ Եվ ակնհայտ է, որ որոշ հիմնարկների ղեկավարներ, որոշ համայնքների ղեկավարներ, իրենց վարչական լծակներն օգտագործելով, մարդկանց տանում են հավաքների։
Իհարկե, ես իրավապահներին ասում եմ, որ օրենքում դրույթ ենք մտցրել, որ մարդկանց հարկադրելը հավաքին մասնակցելու կամ հետ պահելը քրեորեն պատժելի է։ Բայց էս դեպքում կան պրոցեդուրաներ, էդ մարդիկ պիտի գնան ցուցմունք տան։
Ես հիմա ասում եմ շատ ուղիղ ու հստակ. ընտրություններից հետո լինելու են վենդետաներ էն համայնքների ղեկավարների նկատմամբ, ովքեր ժողովրդին փորձում են ենթարկել հարկադրանքի։
Էն հիմնարկների ղեկավարները, ինձ չի հետաքրքրում՝ մասնավոր կլինի էդ հիմնարկը, հանրային կլինի, ովքեր իրենց աշխատողներին որևէ հարկադրանքի են ենթարկել, ենթարկվելու են ամենադաժան, բայց քաղաքական վենդետաների։ Էդ համայնքի ղեկավարները, կարճ ասած, ռադ են լինելու, և այնտեղ լինելու են արտահերթ ընտրություններ։ Էդ հիմնարկների ղեկավարները, թեկուզ սեփականատերեր լինեն, ինձ չի հետաքրքրում, եթե սեփականատերերը կսկսեն դիմադրել, սեփականատերերով էլ կզբաղվենք, իրենց էլ կենթարկենք ամենադաժան քաղաքացիական վենդետաների։ Ես զգուշացնում եմ, դե հանկարծ չփորձեք թպրտալ։ Կադրային ջարդուփշուր է լինելու, բոլոր ստահակները քշվելու են պետական կառավարման համակարգից, ովքեր ժողովրդի ներողամտությունից օգտվելով՝ երեք տարի գործել են ժողովրդի դեմ։ Բոլորին հատ-հատ վզներից բռնած անձամ դուրս եմ շպրտելու պետական կառավարման համակարգից։ Եվ ուրեմն, պատրաստվեք քաղաքացիական վենդետաների, կադրային ջարդերի»,- ասաց Նիկոլ Փաշինյանը։
Մանրամասները՝ տեսանյութում:
