Գործող իշխանության պատճառով այսօր ունենք կազմալուծված պետական համակարգ. Մուսինյան. ՏԵՍԱՆՅՈՒԹ

«Հայ ազգային կոնգրես» կուսակցությունը անհրաժեշտ է համարում Ռուսաստանի հետ ստեղծել երկկողմ և ռազմավարական հարաբերությունների խորացմանն ու ներդաշնակեցմանն ուղղված նոր մեխանիզմներ: Այս մասին նշեց «Հայ ազգային կոնգրես» կուսակցության անդամ, ՀՀ առաջին նախագահի մամուլի խոսնակ Արման Մուսինյանը` ներկայացնելով կուսակցության նախընտրական ծրագիրը անվտանգության ոլորտի մասով:

«Դա թույլ կտա պետության գոնե կարճաժամկետ հեռանկարում չեզոքացնել առկա ռեալ սպառնալիքները և արդեն միջնաժամկետ ու երկարաժամկետ կտրվածքով դնել Հայաստանի երկարամյա անվտանգության հիմքերը»,- ասաց Մուսինյանը:

Հաշվի առնելով Լեռնային Ղարաբաղի կարգավիճակի դեռ չորոշված լինելը, Մուսինյանը ասաց, որ «Հայ ազգային կոնգրես»-ն անհրաժեշտ է համարում Ռուսաստանի և ԵԱՀԿ Մինսկի խմբի մյուս համանախագահ երկրների հետ  ակտիվ բանակցություններում ներգրավումը, այդ թվում նաև Ադրբեջանի հետ, որոնք միտված կլինեն ինչպես այս հարցի վերջնական հստակեցմանը, այնպես էլ Հայաստանի և Ադրբեջանի միջև փոխադարձ վստահության աստիճանական ձեռքբերմանը:

«Այն թույլ կտա ապագայում հասնել նրան, որ երկու երկրների միջև կկնքվի զինված հակամարտության դադարացման մասին պայմանագիր և, ըստ էության, հող կնախապատրաստի հնարավոր հետագա հարաբերությունների համար»,- նշեց Մուսինյանը:

«Հայ ազգային կոնգրես»-ը կարևորում է նաև Հայաստանի ներսում մի շարք հրատապ քայլերի ձեռնարկումը: Նրա խոսքով՝ երկրում առաջնահերթ է պետական համակարգի կառավարելիության ապահովումը։

«Ցավոք, գործող իշխանության քայլերի շնորհիվ մենք ունենք կազմալուծված պետական համակարգ, որի մի մասն է կազմում նաև ուժային, անվտանգային համակարգը։ Այսօր, եթե նույնիսկ ընդունվում են խեամիտ որոշումներ, այդ համակարգի խաթարված, ջարդված լինելը թույլ չի տալիս դրանք իրականացնել։ Թեև պետք է անկեղծ լինենք ու ասենք, որ թե նախապատերազմյան, թե պատերազմական, թե հետպատերազմյան շրջանում  այս կառավարությունն այդպես էլ ունակ չեղավ մի խելամիտ որոշում կայացնել

Երկրորդ կարևոր էլեմենտը քաղաքական կայունության ապահովումն է և հասարակության շրջանում համերաշխության ձևավորումն է, որպեսզի դա նաև լինի ամուր թիկունք հաջորդ իշխանությունների համար հարևանների, հակառակորդների, բարեկամների, չարակամների հետ իր հարաբերություններում ավելի ուժեղ զգալու»,- եզրափակեց Մուսինյանը:

Մանրամասները՝ տեսանյութում: