«Վնգստացող դատավորները» չեն հեռացվել. դատաիրավական ինչ հեղափոխության մասին է խոսում Փաշինյանը․ ՏԵՍԱՆՅՈՒԹ

Դատավորների վեթինգի խոստում տված, բայց չիրականացրած Նիկոլ Փաշինյանն այսօր Ազգային ժողովում հայտարարեց, որ արդարադատության ոլորտում իրականացրել են հեղափոխական փոփոխություններ: Սա մի բան է, որը կարող էր անել միայն քրիստոնեական արժեքների վրա հիմնված կառավարությունը, շեշտում է Փաշինյանը և ակնարկում, որ իր ղեկավարած կառավարությունը հենց այդպիսին է:

Նիկոլ Փաշինյանի պատկերացմամբ՝ այս ձեռքբերումը, սակայն, որևէ աղերս չունի դատական համակարգի այն բարեփոխումների հետ, որ նա էր խոստանում: Փաշինյանը հանրությանը խոստացել էր, որ քաղաքացին ամբողջական տեղեկատվություն կունենա դատավորի ունեցած քաղաքական կապերի ու ծագումնաբանության, գույքային վիճակի, դատավորի կարգավիճակում և նախորդ շրջանում ծավալած գործունեության, անհատական ու պրոֆեսիոնալ հատկանիշների մասին:

Ուղիղ տասը օրից լրանում է Փաշինյանի այս հայտարարության երկու տարին, սակայն այդպես էլ չիմացանք, թե քանի դատավոր քաղաքական, խնամիական և այլ կապեր ունի նախկինների հետ, չհրապարակվեց մեկ դատավորի անուն, որը կոռուպցիոն ճանապարհով էր մուտք գործել համակարգ: Այսօր Փաշինյանն արդեն հայտարարում է՝ չեն ձգտել այնպիսի համակարգի ստեղծմանը, որը իշխանությանը «թարս բան» ասողին կկալանավորի:

Իմքայլական պատգամավորը քաղաքական ղեկավարից հետաքրքրվում է՝ ո՞ւր են նախկիններից կախվածության մեջ գտնվող դատավորները, ինչո՞ւ չեն պատժվում և հեռացվում համակարգից: Նիկոլ Փաշինյանը հիշեցնում է ԲԴԽ նախագահ Ռուբեն Վարդազարյանի առնչությամբ հարուցված քրեական գործը և շեշտում՝ դատական համակարգն ինքն է պայքարում իր անկախության համար:

Հիշեցնենք՝ օրերս գաղտնալսված ձայնագրություն էր տարածվել համացանցում, որի համաձայն՝ դատավոր Արմեն Բեկթաշյանն ինչ-որ մեկի հետ զրույցում պատմում է, թե ինչպես է ԲԴԽ նախագահ Ռուբեն Վարդազարյանն իրեն ցուցումներ տալիս քրեական հեղինակություն համարվող Վահագն Աբգարյանի՝ Ալավերդցի Վահագնի գործով, որ Աբգարյանին բաց թողնեն:

Անդրիաս Ղուկասյանը, որը ԵԽԽՎ-ի և հեղինակավոր Amnesty International կազմակերպության կողմից Սերժ Սարգսյանի իշխանության օրոք ճանաչվել էր քաղբանտարկյալ, և մինչ օրս էլ նրա քրգործը կարճված չէ, Factor TV-ի հետ զրույցում նշում է՝ Հայաստանում դատական համակարգում որևէ իրական բարեփոխում չի եղել: Ըստ քաղաքագետի՝ Նիկոլ Փաշինյանը նախընտրական շրջանում քաղաքացիներին մոլորեցնող ելույթներ է ունենում:

Վերջերս էլ ԱՄՆ պետքարտուղարությունն արձանագրել էր, որ 2018 թվականի իշխանափոխությունից հետո Հայաստանում դատական համակարգը չի բարեփոխվել, քաղաքացիները դատավորներին չեն վստահում, իսկ դատավորների մեծ մասը նախկին իշխանությունների կամակատարներն են: Պետքարտուղարության՝ մարդու իրավունքների 2020 թվականի զեկույցում, մասնավորապես, ասվում էր, որ Հայաստանում դատական համակարգն անկախ և անկողմնակալ չէ, հանրության վստահությունը դատավորների նկատմամբ շարունակում է ընկնել: Արդարադատության ոլորտում մնացել են մեծ թվով պաշտոնյաներ, որոնք ծառայել են նախկին իշխանություններին և կայացրել նրանց համար բացառապես բարենպաստ վճիռներ: Անդրիաս Ղուկասյանն ասում է՝ վեթինգի իրականացումն անխուսափելի է:

Իրավապաշտպան Ժաննա Ալեքսանյանին էլ մտահոգում է ԱԺ ամբիոնից Նիկոլ Փաշինյանի կողմից արդեն երկրորդ անգամ հնչող այն պնդումը, որ ՔԿՀ-ներում անմեղ մարդիկ չկան: Իրավապաշտպանը շեշտում է՝ սա անմեղության կանխավարկածի խախտում է և, ի հակառակ վարչապետի պաշտոնակատարի պնդումների, որ ՔԿՀ-ներում բարենպաստ պայմաններ են ստեղծված, հենց երեկ տեղի ունեցած արտակարգ դեպք է ներկայացնում:

Ժաննա Ալեքսանյանը նկատում է՝ թեև Նիկոլ Փաշինյանը ճիշտ է ասում, որ դատական համակարգը քաղաքական իշխանությունից կախվածություն չունի, ինչպես Ռոբերտ Քոչարյանի և Սերժ Սարգսյանի նախագահության տարիներին, սակայն այդքանով միայն անհնար է համարել, որ  համակարգը բարեփոխված է:

Նշենք, որ Նիկոլ Փաշինյանի մատնանշած հեղափոխական փոփությունների ենթարկված դատական համակարգը հեղափոխությունից հետո հասարակական հնչեղություն ունեցող որևէ գործով վճիռ չի կայացրել:

Մանրամասները՝ տեսանյութում։

Նարեկ Կիրակոսյան