ԱԺ ուժերը՝ արտահերթի վերաբերյալ. Սերժ Սարգսյանը՝ հաջորդ իշխանության մասին. Լուրեր

Հունիսի 20-ին Հայաստանում կլինեն արտահերթ խորհրդարանական ընտրություններ։ Այս մասին հայտնել է վարչապետ Նիկոլ Փաշինյանը՝ ԲՀԿ ղեկավար Գագիկ Ծառուկյանի հետ հանդիպումից հետո։ Նա նշել է, որ ստեղծված ներքաղաքական իրադրությունից լավագույն ելքը արտահերթ խորհրդարանական ընտրություններն են:

Հանդիպումից հետո Գագիկ Ծառուկյանն իր էջում գրել է, որ նոր իշխանություն և նոր կառավարություն ձևավորելու միակ լեգիտիմ ճանապարհը արտահերթ ընտրություններն են: Ժողովուրդն իր քվեով պետք է որոշի, թե ում է վստահելու հաջորդ իշխանությունը:

ԱԺ ԼՀԿ խմբակցության ղեկավար Էդմոն Մարուքյանն էլ տեղեկացրել է, որ հեռախոսազրույց է ունեցել Փաշինյանի հետ։ Մարուքյանը տեղեկացրել է, որ հունիսի 20-ը, որպես արտահերթ խորհրդարանական ընտրությունների օր, իրենց համար ընդունելի է։

—

Երրորդ նախագահ Սերժ Սարգսյանն այսօր դատարանի դիմաց հավաքված համակիրների հետ հանդիպմանը ասել է, մեջբերում եմ, կապիտուլյանտները պետք է հեռանան: Ժողովուրդը պետք է ընտրի պետականամետ կառավարություն, որը պետք է լծվի ՀՀ անվտանգության և քաղաքացիների բարեկեցության բարձրացման գործին։ Նա նշել է, որ այն, ինչ մնացել է Արցախից, երբեք չի լինելու Ադրբեջանի կազմում։

—

ՀՀ երրորդ նախագահ Սերժ Սարգսյանի և մյուսների քրգործով անցնող նախկին գյուղատնտեսության նախարար Սերգո Կարապետյանի և նրա տեղակալի` Սամվել Գալստյանի նկատմամբ քրեական հետապնդումը դադարեցվել է նրանց մահվան հիմքով։ Դատարանը նման որոշում է ընդունել նրանց հարազատների միջնորդությամբ։