18.11.2024 | 18:41
Շոլցը նախկինի պես համաձայն չէ Ուկրաինային TAURUS թևավոր հրթիռներ մատակարարել
ՔԿՀ-ներում մահացության թիվը 2020-ին զգալիորեն նվազել է․ արդարադատության նախարարի զեկույցը. ՏԵՍԱՆՅՈՒԹ
Հասարակություն
16.03.2021 | 12:22
ՀՀ արդարադատության նախարարությունը 2020-ին մարդու իրավունքների պաշտպանության ոլորտում իրականացրել է մի շարք աշխատանքներ՝ այսպիսով նախորդ տարի իրականացնելով 2020-2022թթ. համար նախատեսված գործողությունների ամբողջ ծրագրի 25 տոկոսը: ՀՀ արդարադատության նախարար Ռուստամ Բադասյանը կատարված աշխատանքները ներկայացրեց ԱԺ մարդու իրավունքների պաշտպանության և հանրային հարցերի մշտական հանձնաժողովի նիստում ՝ ներկայացնելով Հայաստանի Հանրապետության կառավարության ծրագրի 2020 թվականի կատարման ընթացքի և արդյունքների մասին զեկույցի այն հատվածը, որը վերաբերում է մարդու իրավունքներին:
Բադասյանը հիշեցրեց, որ կառավարությունը 2019-ի դեկտեմբերին հաստատել է մարդու իրավունքների պաշտպանության ազգային ռազմավարությունը և դրանից բխող 2020-2022 թթ. գործողությունների ծրագիրը: «2020-ին նախատեսված է եղել իրականացնել 25 միջոցառում: 2020-ին սակայն ամբողջությամբ կատարվել է 15 միջոցառում, որը կազմում է մոտ 60 տոկոս, մասամբ է իրականացվել 8 միջոցառում՝ 32 տոկոսը և չի իրականացվել 2 միջոցառում, ինչի պատճառը համավարակի և պատերազմի հետևանքներն են: 2020-ին իրականացվել են նաև մի շարք միջոցառումներ, որոնց իրականացման ժամկետը նախատեսված է եղել 2021-2022թթ. համար: Դրանց մեծ մասը վերաբերում են Քրեական և քրեական դատավարության օրենսգրքերի նախագծերին: Արդյունքում 2020-ին իրականացվել է ամբողջ գործողությունների ծրագրի 25 տոկոսը»,-ասաց նախարարը:
2021-ի սկզբից նախարարությունը նախաձեռնել է մարդու իրավունքների պաշտպանության գործողությունների ծրագրի փոփոխության գործընթաց՝ միտված պատերազմից հետո մարդու իրավունքների պաշտպանության ոլորտում առկա խնդիրների վերհանմանն ու ինստիտուցիոնալ կերպով ռազմավարական մակարդակում դրանց հասցեագրմանը:
Բադասյանը նշեց նաև Քրեական և քրեական դատավարության օրենսգրքի նախագծերի մասին, որոնք առաջին ընթերցմամբ արդեն ընդունվել են. «Քրեական նոր օրենսգրքով նախատեսվում է ազատազրկման այլընտրանք հանդիսացող նոր պատժատեսակ, որը ազատության սահմանափակումն է: Այս պատժատեսակը դատապարտյալներին առանց հասարակությունից մեկուսացնելու տնային պայմաններում հսկողության տակ պահելու հետ կապված այլընտրանքային պատիժ է, որը կարող է կիրառվել օրենքով նախատեսված որոշ հանցագործությունների համար: Տվյալ պատժատեսակին դատապարտվողները չեն կտրվում օրինակ ուսումնառությունից: Նշված պատժատեսակը հնարավոր է կիրառել էլեկտրոնային հսկողության միջոցների օգնությամբ, որոնք ամրացվում են ազատազրկված անձի կամ ձեռքին կամ ոտքին»:
«Բոլոր մարզերում գործում են ընտանիքում բռնության ենթարկված անձանց աջակցման կենտրոնները, որտեղ բռնության ենթարկված անձանց մատուցում են իրավական և սոցիալ-հոգեբանական ծառայություններ: Խոշտանգումների կանխարգելման նպատակով ոստիկանության թվով 21 ստորաբաժանումների հարցաքննության համար նախատեսված սենյակներում տեղադրել են տեսաձայնագրման համակարգեր, 20 տարածքային ստորաբաժանումների ելքերում և մուտքերում տեղադրվել են 70 տեսահսկման համակարգեր և համակցվել են գերատեսչական ցանցին»,-ասաց Բադասյանը:
Նախարարը նաև հիշեցրեց, որ 2020-ի փետրվարից քրեական պատասխանատվություն է նախատեսվել քրեական աստիճանակարգության բարձրագույն կարգավիճակ տալու կամ ստանալու, նման կարգավիճակ ունեցող անձին դիմելու և այլ արարքների համար:
Բադասյանը նաև տեղեկացրեց, որ ՔԿՀ-ներում մահացության թիվը 2020-ին զգալիորեն նվազել է:
Մանրամասները՝ տեսանյութում:
