Հակոբ Ասլանյանը փոշմանել է, բայց արդեն ուշ է․ նա հեռացվեց ՔՊ-ից

Պատգամավոր Հակոբ Ասլանյանը զղջացել է ՔՊ-ի հետ համագործակցությունը կասեցնելու մասին Factor TV-ի եթերում արած իր հայտարարության համար և հետ է կանգնել այդ որոշումից։ Տեղեկությունը Factor TV-ին փոխանցեց ինքը՝ Ասլանյանը, նաև մանրամասնեց, թե ինչո՞ւ «արդարության հետևից մինչև վերջ չգնաց» խմբակցությունից դուրս գալու եղանակով՝ ինչպես ինքը ազդարարել էր։

«Ինչո՞ւ մտափոխվեցիք, պարո՛ն Ասլանյան»,- մեր այս հարցին ի պատասխան՝ նա ասաց․ «Եսիմ, երևի սառը դատողությունը տեղն եկավ»։ Ճշտող հարցին՝ իսկ միգուցե կուսակիցները ճնշե՞լ են՝ արձագանքեց. «Դու քո ասածին հավատո՞ւմ ես»։ Այդուհանդերձ, ինչո՞ւ մտափոխվեց և որոշեց չդադարեցնել ՔՊ-ի հետ համագործակցությունը․ «Հասկացա, որ տաք էր սիրտս, հիմա սառն է ուղեղը։ Մեր կյանքում քի՞չ է եղել, որ մի բան ասել ենք, և հասկացել ենք հետո՝ սխալ է, ու դա փոխել ենք»,- իր նահանջը այսպես արդարացրեց Ասլանյանը։ Անդրադառնալով հարցին՝ գուցե պատգամավորը մտավախություն է ունեցել, որ ՔՊ խմբակցությունից դուրս գալու պարագայում իրեն առնչվող գրագրություններ ևս կհրապարկեին ՔՊ-ից, Ասլանյանն ասաց.«Չէ, ինձ վրա ռուչկեք չկան»։

Հարցրինք նաև՝ ո՞վ իր հետ զրույց ունեցավ Factor TV-ին տված հարցազրույցից հետո, որ ինքը ժամեր անց մտափոխվեց և որոշեց չհեռանալ խմբակցությունից, Ասլանյանը պատասխանեց․ «Ոչ մեկը»։ Իսկ ինչո՞ւ է իր ֆեյսբուքյան էջում հրապարակել ՔՊ վարչության անդամ Մխիթար Հայրապետյանի ուղարկած տեքստը, ըստ որի՝ Ասլանյանը «մեղա է գալիս» ՔՊ խմբակցությունից հեռանալու մտադրության մասին իր հայտարարությունից՝ պնդելով, թե «Քաղաքացիական պայմանագրի» հետ իր համագործակցությունը կասեցնելու վերաբերյալ հայտարարությունը հիմնված է եղել սխալ տեղեկությունների վրա, և որ իր հայտարարությունը համարում է սխալ եւ էմոցիոնալ:

1 ամսով կասեցնում եմ ՔՊ-ի հետ համագործակցությունս․ խմբակցությունից, գուցե, դուրս գամ, մանդատս վայր չդնեմ․ Հակոբ Ասլանյան․ ՏԵՍԱՆՅՈՒԹ

Ի դեպ, Հակոբ Ասլանյանը, հավանաբար անզգուշության հետևանքով, Ֆեյսբուքի իր էջում հրապարակել էր նաև սքրինշոթ, որում երևում է, որ Մխիթար Հայրապետյանի կողմից է «մեղայական գալու մասին» տեքստը ուղարկվել Ասլանյանին։ Վերջինս այսպես բացատրեց այս միջադեպը՝ հերքելով, թե Հայրապետյանն է տեքստի հեղինակը․

«Ես տեքստը գրելուց հետո Մխիթարի հետ փորձեցի խմբագրել, դա ուղարկեցի իրեն, ինքը հետ ուղարկեց, ես չէի նկատել, դե մի քիչ էլ չեմ տիրապետում, չէի նկատել, որ այնտեղ իր անուն ազգանունն էլ է երևում, բան էի արել․․․»։ Նկատենք, սակայն, որ պատգամավորի այս նկարագրությունը հակասում է իր և Հայրապետյանի չատում գրառումների դասավորությանը։ Մխիթար Հայրապետյանի հարցից հետո, թե իսկապե՞ս Ասլանյանը նման բան է ասել (Հայրապետյանը կից ուղարկել էր նաև Factor TV-ին Ասլանյանի տված հարցազրույցի հղումը), վերջինս այլևս տեքստ չի ուղարկել Հայրապետյանին։ Իր իսկ անպատասխան հարցից հետո Հայրապետյանը միանգամից Ասլանյանին ուղարկել է «մեղայականի մասին» տեքստը։

Մխիթար Հայրապետյանը ուղղորդե՞լ է Հակոբ Ասլանյանին «մեղայականով» հանդես գալ․ պատգամավորն ուշագրավ սքրինշոթեր է հրապարակել, հետո ջնջել դրանցից մեկը

Չի բացառվում, որ այդ ընթացքում նրանք հեռախոսով կամ այլ հավելվածով են շփվել։ Հակոբ Ասլանյանը այսպես մեկնաբանեց այս դրվագը․ «Քանի որ սխալ էր, բոլորը ջնջել եմ»։ Սակայն Հակոբ Ասլանյանի հրապարակած սքրինշոթում չի երևում, որ ինքը Հայրապետյանին նամակ է ուղարկել և ջնջել։ Ինչպես հայտնի է՝ ֆեյսբուքյան մեսենջերում նշում է հայտնվում, եթե ուղարկված հաղորդագրությունը ջնջվում է։ Չնայած այս փաստին, Ասլանյանը պնդեց, որ ինքը ջնջել է Հայրապետյանին իր ուղարկածը՝ փորձելով մեզ համոզել, որ ոչ թե Հայրապետյանն է իր հրապարակած տեքստի հեղինակը, այլ՝ ինքը․ «Եղել է, բոլորը մնացել են, ես ջնջել եմ մենակ վերջինը»,- ասաց նա։

Օրեր առաջ պատգամավոր Հովիկ Աղազարյանն ասել էր, որ իրեն հանդիպել են «ուժեղ տղաներ» և անձնական կյանքի մանրամասները հարազատներին փոխանցելու սպառնալիքով ճնշումներ են գործադրել՝ փորձելով հարկադրել հրաժարվել մանդատից։ Հաշվի առնելով այս հայտարարությունը՝ պարոն Ասլանյանին հարց ուղղեցինք՝ իրեն ինչպե՞ս են ճնշել, որ մտափոխվել է․

«Երկու հատ թնդանոթ էր, հինգ հատ պուլիմյոտ»,- մեր հարցը կատակի տալով՝ Ասլանյանը փորձեց շրջանցել սպառնալիքի ենթարկվելու թեման։ Վստահեցրեց, որ ինքը էլի է «արդարության հետևից գնալու», սակայն հարցազրույցում ցուցաբերած վճռականությունը, վստահաբար, նրա ձայնից և խոսելու տոնից անհետացել էր․

«Ես էլի իմ հարցը կպահեմ, բայց պարզապես հասկացա, որ պետք չէր դա»։ Արդյո՞ք իր այս հետնահանջից Հովիկ Աղազարյանը չի նեղսրտի․ «Ո՛չ, չի նեղանա»։ Պարոն Ասլանյանը նաեւ վստահեցրեց, որ Factor TV-ի հարցազրույցից հետո վարչապետից էլեկտրոնային նամակ չի ստացել։ Ի դեպ, Հակոբ Ասլանյանը պնդեց, որ չի դիտել ՔՊ վարչության անդամ Արսեն Թորոսյանի հարցազրույցը Factor TV-ին, որի ժամանակ վերջինս «դավաճանություն» և «դասալքություն» էր որակել Աղազարյանի և Ասլանյանը պահվածքը, և նշել էր, որ Հակոբ Ասլանյանին ՔՊ խմբակցությունից հեռացնելու որոշում կկայացվի։

Հակոբ Ասլանյանը, դավաճանելու մասին Թորոսյանի մեղադրանքը մեկնաբանելով, ասաց․ «Թող համարի» (նկատի ունի՝ դավաճան)։ Մինչ  պատրաստում էինք այս հրապարակումը, հայտնի դարձավ, որ Հակոբ Ասլանյանը հեռացվել է ՔՊ խմբակցությունից։ Այդ մասին հայտնեց ՔՊ խմբակցության քարտուղար Արթուր Հովհաննիսյանը․ «Քաղաքացիական պայմանագիր խմբակցությունը միաձայն որոշում է կայացրել հեռացնել Հակոբ Ասլանյանին խմբակցության կազմից` լրջագույն կարգապահական խախտման, ինչպես նաև Քաղաքացիական պայմանագիր կուսակցության որդեգրած արժեքների և քաղաքական ուղեգծի հետ խիստ անհամատեղելի վարքի պատճառով»:

Ռոբերտ Անանյան