18.07.2026 | 14:18
2026-ին Հայաստանի բուհեր ընդունվել է 9620 դիմորդ․ ԳԹԿ
Ադրբեջանի ընդդիմությունը ԱՄՆ-ին ու ԵՄ-ին կոչ է անում երկրի իշխանությունների դեմ պատժամիջոցներ սահմանել
Քաղաքականություն
11.12.2024 | 21:44
Ադրբեջանի ընդդիմադիր Ժողովրդական ճակատ կուսակցությունը դատապարտել է լրագրողների և ակտիվիստների վերջին ձերբակալությունները։ Հայտարարության մեջ ասվում է, որ կուսակցությունը, չնայած բոլոր հետապնդումներին և ճնշումներին, կշարունակի վճռական պայքար մղել երկրում «տոտալիտար ռեժիմ» հաստատելու ծրագրերի դեմ և չի նահանջի իր ճանապարհից։
Նշվում է, որ Ադրբեջանի իշխանությունները բռնաճնշումների նոր ալիք են սկսել COP29-ից հետո։ Դեկտեմբերի սկզբից քաղաքական դրդապատճառներով ձերբակալվել է 9 մարդ՝ իրավապաշտպան Ռուֆաթ Սաֆարովը, MeydanTV-ի աշխատակիցները, քաղաքագետ Ազեր Գասիմլին։ Նրանցից յուրաքանչյուրի նկատմամբ խափանման միջոց է ընտրվել 4 ամիս ժամկետով կալանավորումը։
Կուսակցությունը նաև մատնանշում է դեկտեմբերի 10-ին 6,5 տարվա ազատազրկման դատապարտումը Դաշքեսանի կուսակցության շրջանային կազմակերպության ղեկավար Սահիբ Մամեդզադեի, որը ձերբակալվել էր թմրանյութերի ապօրինի շրջանառության կեղծ մեղադրանքով։
«Այսպիսով, մեկ շաբաթվա ընթացքում երկրում երկար ժամանակով ազատազրկված քաղբանտարկյալների թիվը 319-ից հասել է 328-ի։ PFLP-ն նշում է, որ այս ձերբակալություններն Իլհամ Ալիևի՝ տարիներ շարունակ երկրում ժողովրդավարական ինստիտուտներն ու ներուժը ոչնչացնելու քաղաքականության մի մասն են։ Նպատակը խոսքի և կարծիքի ազատության, մարդու իրավունքների պաշտպանության, ընդդիմադիր քաղաքական նախաձեռնությունների վրա հարձակումն է»,- ասվում է հայտարարությունում։
Նշվում է, որ ռեպրեսիվ ալիքի մաս է կազմում նաև Ժողովրդական ճակատ կուսակցության առաջնորդ Ալի Քերիմլիի պատվիրված դատավարությունը։
Կուսակցությունը միջազգային հանրությանը, այդ թվում՝ ԱՄՆ-ի, ԵՄ-ի և Մեծ Բրիտանիայի կառավարություններին կոչ է արել կոշտ միջոցներ ձեռնարկել Ադրբեջանի իշխանությունների դեմ, ներառյալ նպատակային պատժամիջոցները՝ դադարեցնելու երկրի վերածումը «տոտալիտարիզմի»։
Թարգմանությունը՝ Էմմա Չոբանյանի
