09.06.2026 | 21:50
«Թալիբան»-ն Աֆղանստանի պետական ծառայողներին արգելել է սմարթֆոններ օգտագործել
ԱՄՆ-ը չի համաձայնել ապաարգելափակել Իրանի ակտիվները
Քաղաքականություն
11.03.2021 | 12:46
Միացյալ Նահանգները Իրանի ակտիվների ապաարգելափակման համաձայնություն չի տվել և չի պատրաստվում դա անել ապագայում, քանի դեռ Թեհրանը չի վերադառնա իր միջուկային ծրագրի շուրջ համաձայնագրի կատարմանը։ Այս մասին հայտարարել է ԱՄՆ պետքարտուղար Էնթոնի Բլինկենը, գրում է ՏԱՍՍ-ը։
ԱՄՆ Կոնգրեսի ներկայացուցիչների պալատի արտաքին գործերի հանձնաժողովի լսումների ժամանակ նրան խնդրել են մեկնաբանել ԶԼՄ-ների հաղորդագրություններն այն մասին, թե Հարավային Կորեայի իշխանությունները կապաարգելափակեն 7 միլիարդ դոլարի իրանական ակտիվները Ջո Բայդենի վարչակազմի հետ խորհրդակցություններից հետո։
Ի պատասխան Բլինկենը հավատացրել է, որ ԱՄՆ-ը համաձայնություն չի տվել իրանական որևէ ակտիվի ապաարգելափակմանը, և մտադիր չի դա անել ապագայում, եթե Իրանն ինքը որոշակի քայլեր չձեռնարկի։
«Մենք դա չենք անի։ Այս հաղորդագրությունները սուտ են։ Ինչպես մենք ասել ենք, եթե Իրանը վերադառնա միջուկային համաձայնագրի շրջանակներում իր պարտավորություններին, մենք ևս նույնը կանենք։ Դա իր մեջ կներառի նաև պատժամիջոցների թուլացումը՝ համաձայն համաձայնագրերի»,- ասել է նա։
Տաթև Ֆռանգյան
