Ռոբսոնին աղմկահարույց հարցազրույցից ուղիղ մեկ տարի առա՞ջ էին պաշտոնանկ արել

Հունվարի 9-ին հայ հանրությունը զարմանքով տեղեկացավ, որ երկրի արտաքին գործերի նախարարին խորհուրդներ է տալիս սոչիաբնակ գործարար, քրեական տարբեր պատմությունների առնչությամբ մամուլի ուշադրության կենտրոնում հայտնված Ռուբեն Թաթուլյանը՝ Ռոբսոն մականունով:

Թաթուլյանը, ով ունի Հայաստանի Հանրապետության դիվանագիտական անձնագիր և շրջում է դիվանագիտական պետհամարանիշերով մեքենայով, Սոչիի բլոգերներից մեկին տված հարցազրույցում հայտարարել էր, թե դրանում զարմանալի ոչինչ չկա, քանի որ ինքը հանդիսանում է Հայաստանի Արտաքին գործերի նախարարի խորհրդականը: Թաթուլյանն այդ հարցազրույցում նաև «ոչ այնքան դիվանագիտական» հայտարարություններ էր արել ԱՄՆ-ի մասին: Ավելի կոնկրետ՝ ասել էր. «Ես չեմ ուզում քարտեզի վրա տեսնել ԱՄՆ-ն»: Ահա հենց այս հայտարարությունը պատճառ դարձավ, որ հայրենի ԱԳՆ-ն ստիպված լինի արձագանքել:

ԱԳՆ մամլո խոսնակ Տիգրան Բալայանը, մասնավորապես, հունվարի 9-ին հայտարարեց, թե «Ռուբեն Թաթուլյանը եղել է ԱԳ նախարարի արտահաստիքային խորհրդական և այժմ նա այդ կարգավիճակը չունի»։

Factor.am-ը փորձեց ԱԳՆ-ից պարզել, թե երբվանից է Թաթուլյանը զրկվել իր կարգաիճակից, արդյոք դա եղել է նշված աղմկահարույց հարցազրույցի հրապարակումից առաջ, թե հետո: Մի քանի անգամ ուղարկված մեր գրավոր հարցումներին ԱԳՆ-ից տրվում էին թերի պատասխաններ, որոնցում չկար մեզ հուզող հարցի պարզաբանումը: Ի վերջո, մեր հետևողական ջանքերի արդյունքում, ԱԳՆ մամուլի խոսնակ Տիգրան Բալայանը հայտնեց, որ Ռուբեն Թաթուլյանը ՀՀ ԱԳ նախարարի արտահաստիքային խորհրդականի պաշտոնում աշխատել է 2016թ հուլիսի 18–ից մինչև 2017 հունվարի 8-ը: Ասել է թե՝ այն պահին, երբ Ռոբսոնը հայտարարում էր, որ ինքը ՀՀ ԱԳ նախարարի խորհրդականն է, արդեն մեկ տարուց ավել է՝ ազատված էր պաշտոնից:

Մնում է միայն զարմանալ, թե ինչն է պատճառը, որ այդ տեղեկատվությունն այդքան խնամքով գաղտնի էր պահվում: Գուցե խնդիրը Թաթուլյանի՝ մինչ օրս օգտագործվող դիվանագիտական անձնագիրն ու մեքենա՞ն է:

Լիլիթ Շաբոյան