Ինչու Քոչարյանը չի խոսում Ստեփանակերտի իր տան մասին, որին ոչ մի ռումբ չի կպել. Ալեն Սիմոնյան. ՏԵՍԱՆՅՈՒԹ

«Իշխանություններին միակ մտահոգող բանը ՀՀ քաղաքացու հետ երկխոսությունն է: Մենք ասելիք ունենք ու շատ բան պարտք ենք: Ժողովրդի անկեղծության ու իմաստնության վրա ես զարմացած եմ»,- այս մասին Factor.TV-ի հետ զրույցում ասաց ԱԺ փոխնախագահ Ալեն Սիմոնյանը՝ անդրադառնալով հարցին, թե արդյոք իշխանությունները մտահոգված են ընդդիմադիրների գործունեությամբ, և դիտարկմանը, որ ընդդիմադիր դաշտում «17-ի» ձևաչափը փախակերպվել է վեցնյակի, որտեղ ներգրավված են Ռ. Քոչարյանը, Ս. Սարգսյանը, Գ. Ծառուկյանը, Ա.Վանեցյանը, Վ.Մանուկյանը, Ի. Սաղաթելյանը, և քննարկում են՝ ինչպես հասնել իշխանության հրաժարականին:

Անդրադառնալով դիտարկմանը, որ Ռ.Քոչարյանը վճռական է տրամադրված, հայտարարել է, որ մասնակցելու է ընտրություններին և հաղթելու է, Սիմոնյանը նշեց. «Երբ որ ընտրություններ լինեն, անպայման թող մասնակցի: Ինձ մոտ տպավորություն է, որ նա գերագնահատում է հանրության կողմից իր կերպարի ընկալումը… Առնվազն 10-20 տարի պետք է չերևան, որ մարդիկ մոռանան, թե իրենք ՀՀ առաջ ինչերի մեջ են մեղավոր, ինչեր են արել: Հասկանում եմ, որ հիմա քրեական գործի հետ կապված ստիպված են խոսել, բայց քաղաքական առումով որևիցե վտանգ չեմ տեսնում»:

Քոչարյանը հայտարարել է, որ ունի հիմքեր չբացառելու, որ իշխանությունները տարել են պարտության: Որպես հիմնավորում նա նշել է, թե այդ ինչպես եղավ, որ Արցախի նախագահականի շենքը, որտեղ իշխանության ներկայացուցիչներն էին, ադրբեջանցիների կողմից չի թիրախավորվել: Անդրադառնալով այս հայտարարություններին՝ Ալեն Սիմոնյանը նշեց, որ դրանք կտրված են իրականությունից և ընգծեց. «Իսկ ինչո՞ւ Քոչարյանը չի խոսում Ստեփանակերտի իր տան մասին, որին ոչ մի ռումբ չի կպել, երբ որ կողքի տունը քանդվել է»:

Մանրամասները՝ տեսանյութում: