19.01.2026 | 16:17
Դավիթ Համբարձումյանը հնարավորություն ունեցել է չվերադառնալու, բայց վերադարձել է՝ գիտակցումով, որ գնալու է բանտ. պաշտպան
Իրանի համար չափազանց կարևոր է ԼՂ հակամարտության կարգավորումը․ Ջավադ Զարիֆ
Քաղաքականություն
26.01.2021 | 17:49
Իրանի Իսլամական Հանրապետության արտաքին գերատեսչության ղեկավար Մոհամադ Ջավադ Զարիֆը տարածաշրջանային այցի շրջանակում այսօր Մոսկվայում է։
ՌԴ արտգործնախարար Սերգեյ Լավրովի հետ հանդիպման արդյունքներով ճեպազրույցի ժամանակ վերջինս հայտարարել է, որ Իրանի համար չափազանց կարևոր է ԼՂ հակամարտության կարգավորումը:
«Իրանը ԼՂ հակամարտության գոտուն ամենամոտ գտնվող պետությունն է։ Եվ հակամարտության մեկնարկից ի վեր, շուրջ 30 տարի ԻԻՀ-ն բախվել է իր սահմաններին անհանգստությունների, փախստականների ալիքի հետ։ Այս պատճառով էլ այս հակամարտության կարգավորումը մեզ համար չափազանց կարևոր է՝ հաշվի առնելով մեր ազգային անվտանգությունը, քանի որ մեր սահմանների մոտերքում հակամարտություն կար։ ԼՂ-ում վերջերս գրանցված հակամարության ընթացքում Իրանը հսկայական ջանքեր է թափել տարածաշրջանային լուծումներ ներկայացնելու համար։ Այս հարցերի շուրջ ես բազմաթիվ հեռախոսազրույցներ եմ ունեցել պարոն Լավրովի հետ, Իրանի հատուկ հանձնակատարը շրջագայել է տարածաշրջանով ու ներկայացրել է մեր խաղաղության տեսլականը։ Չափազանց ուրախ ենք, որ ՌԴ ջանքերով գտնվել է լուծում, որը չափազանց նման է մեր առաջարկած լուծմանը»,- հայտարարել է Զարիֆը՝ նշելով, որ ուրախ են՝ հակամարտության լուծումը ղեկավարվել է հենց Ռուսաստանի կողմից։
Վերջինս նաև նշել է, որ Լեռնային Ղարաբաղի ծաղկման համար բոլոր նախապայմանները կան, քանի որ տրանսպորտային ապաարգելափակումը կնպաստի տարածաշրջանի զարգացմանը։
Զարիֆը նաև հայտարարել է, որ այցելելու է Հայաստան, Վրաստան և Թուրքիա, տարածաշրջանային հարցերի շուրջ տեսակետների տարբերությունները քննարկելու համար։
Տաթև Ֆռանգյան
