Փաշինյանն ու Ջհանգիրյանը տարիներ առաջ վիրավորում էին միմյանց. ինչու է «Իմ քայլը» առաջադրում նրան. ՏԵՍԱՆՅՈՒԹ

Ազգային ժողովի իշխանական «Իմ քայլը» խմբակցությունը նախկին զինդատախազ, «Մարտի 1»-ի գործով դատապարտված, սակայն 10 տարի անց արդարացված Գագիկ Ջհանգիրյանին առաջադրել է Բարձրագույն դատական խորհրդի անդամի թեկնածու: Խմբակցությունում Ջհանգիրյանի մասնակցությամբ մի քանի ժամ տևած փակ քննարկումից հետո Լիլիթ Մակունցը փոխանցեց՝ «Իմ քայլում» որոշումը միաձայն է ընդունվել:

Գագիկ Ջհանգիրյանին այս իշխանության օրոք ԲԴԽ անդամի պաշտոնում առաջադրելու ֆոնին հիշարժան է դառնում Նիկոլ Փաշինյանի և Գագիկ Ջհանգիրյանի միջև պատգամավորության տարիների սուր վեճերն ու միմյանց հասցեին հնչեցված վիրավորանքները: 2015 թվականի փետրվարի 20-ին Սերժ Սարգսյանին իմփիչմենթ հայտարարելու՝ Փաշինյանի հեղինակած նախագիծը Ջհանգիրյանն անգրագիտություն էր որակել, իսկ երբ Փաշինյանը նույն ոճով արձագանքել էր նրա ելույթին, նախկին զինդատախազը ցուցադրաբար լքել էր դահլիճը:

Այսօր ԱԺ-ում Factor TV-ն ԲԴԽ անդամի թեկնածուին հիշեցրեց այս միջադեպը և հետաքրքրվեց՝ ինչպե՞ս է պատկերացնում աշխատանքը Փաշինյանի իշխանության օրոք։ Ջհանգիրյանն ասաց՝ գայթակղությունների չի տրվի և անցած-գնացած միջադեպերին չի անդրադառնա, փոխարենը Նիկոլ Փաշինյանի հետ ունեցած լավ պահերը հիշեց:

Գագիկ Ջհանգիրյանը վստահեցնում է՝ քաղաքական թիմի անդամ չի դառնում։ Նաև նշում է՝ գնում է մասնագիտական աշխատանք կատարելու: Անդրադառնալով մամուլի հրապարակումներին, թե իշխանություններն իրեն գործուղում են ԲԴԽ, որ «կառույցն իր բռի մեջ հավաքի», Ջհանգիրյանն ասաց՝ եթե ընտրվի, աշխատանքի կանցնի իր տեսլականով:

Գագիկ Ջհանգիրյանի թեկնածությունը միանշանակ չի ընդունվել իրավապաշտպանների կողմից: Ժաննա Ալեքսանյանը պնդում է, որ Ջհանգիրյանի՝ որպես զինդատախազ պաշտոնավարելու տարիներին հանցագործություններ են կոծկվել։ Իրավապաշտպանը նաև հիշեցնում է Մատաղիսի աղմկահարույց գործը, որի քննության ժամանակ Ջհանգիրյանը զինդատախազ է եղել, իսկ ծառայակիցների սպանության համար ցմահ ազատազրկման դատապարտված երեք զինծառայողները տարիներ անց արդարացվել են։

Ինքը՝ Գագիկ Ջհանգիրյանը իրեն ուղղված այս մեղադրանքներին հետևյալ պատասխանն է տալիս․ եթե մեղավոր եմ, ինչու պատասխանատվության չեմ ենթարկվում, քանի որ երկու տարի առաջ դատախազությունը Մատաղիսի գործը վերաբացել և ուղարկել է ԱԱԾ:
Ժաննա Ալեքսանյանն ընդգծում է՝ վատ է, որ գործը վերաբացելուց հետո առաջընթաց չկա։ Իսկ «Իմ քայլը» խմբակցության ղեկավարի պնդմանն ի պատասխան, թե իրենց առաջադրած թեկնածուն պրոֆեսիոնալ է, իրավապաշտպանն ասաց՝ Ջհանգիրյանը լավագույն իրավաբաններից է, բայց նրա գիտելիքները պետության շահին չեն ծառայել:

Փակ հանդիպման ժամանակ Գագիկ Ջհանգիրյանին ուղղվել են հանրության շրջանում առկա այս մտահոգիչ հարցերը: Լիլիթ Մակունցն ասաց՝ ստացել են սպառիչ պատասխաններ:

Գագիկ Ջհանգիրյանը Factor TV-ի հարցին ի պատասխան՝ հերքեց ԲԴԽ նախագահ դառնալու մասին լուրերը: Նա, միաժամանակ, անդրադարձավ ԲԴԽ գործող նախագահ Ռուբեն Վարդազարյանի պնդումներին, որ չի կարող ընտրվել ԲԴԽ անդամ, քանի որ լրացել է 65 տարեկանը:

Ջհանգիրյանը վստահեցնում է, որ օրենքի այդ հոդվածը սահմանում է միայն դատավորների տարիքային շեմը, իսկ իրավաբան-գիտնականների համար տարիքային սահմանափակում չկա: Փոխարենը ԲԴԽ անդամի թեկնածուն դատական համակարգի խնդիրներն է մատնանշում:

ԱԺ ընդդիմադիր խմբակցություններն առայժմ դիրքորոշում չեն հայտնել «Իմ քայլի» առաջադրած թեկնածուի մասին: Վաղը հանդիպելու են «Լուսավոր Հայաստան» և «Բարգավաճ Հայաստան» խմբակցությունների պատգամավորները հանդիպելու են Գագիկ Ջհանգիրյանի հետ: Այս խմբակցություններից խոստացան կարծիք հայտնել հանդիպումից հետո:

Մանրամասները՝ տեսանյութում։

Նարեկ Կիրակոսյան