19.12.2025 | 23:33
ԱՄՆ-ի, Ռուսաստանի և Ուկրաինայի բանակցությունների նոր փուլը տեղի կունենա ԱՄՆ-ում առաջիկա օրերին
ԼՂ-ում հրադադարի վերահսկման ռուս-թուրքական մոնիթորինգային կենտրոնը կառուցվում է Աղդամում․ Թուրքիայի ՊՆ
Քաղաքականություն
21.12.2020 | 17:24
Աղդամում շարունակվում են Լեռնային Ղարաբաղում հրադադարի վերահսկման ռուս-թուրքական համատեղ մոնիթորինգային կենտրոնի կառուցման աշխատանքները։ Այս մասին գրում է «Անադոլու» գործակալությունը՝ վկայակոչելով Թուրքիայի Պաշտպանության նախարարության հաղորդագրությունը։
«Ադրբեջանում տեղի ունեցած իրադարձությունների վերաբերյալ Թուրքիայի ու ՌԴ-ի միջև ստորագրված հուշագրի համաձայն՝ քայլեր են ձեռնարկվում՝ հրադադարի ռեժիմի վերահսկման ու մոնիթորինգային կենտրոնի արագ գործարկման համար։ Համապատասխան ջանքերը կոորդինացվում են Ադրբեջանի ու ՌԴ հետ»,- ասվում է ՊՆ հայտարարության մեջ։
Բացի այդ, նշվում է, որ «Ադրբեջանի ԶՈւ-ին աջակցելու քայլերի շրջանակում, Ադրբեջանում աշխատում է 135 հոգանոց սակրավորների երկու խումբ»։ Եվս 15 խումբ թուրք փորձագետներ էլ, ընդհանուր թվով՝ 64 մարդ, պատրաստում են ադրբեջանցի զինվորականներին տարածքների ականազերծման համար։
«Թուրքիան հետագայում էլ շարունակելու է աջակցել եղբայրական Ադրբեջանին՝ «Մեկ ազգ երկու պետություն» կարգախոսի ներքո»,- ասվում է հայտարարության մեջ։
Նշենք, որ Թուրքիայի ՊՆ ղեկավար Հուլուսի Աքարն ավելի վաղ հայտարարել էր, որ ռուս-թուրքական մոնիթորինգային կենտրոնը տեղակայվելու է Աղդամում, ընթանում են շինարարական աշխատանքները։ ԱՊՀ անդամ երկրների ղեկավարների հանդիպմանն էլ Ադրբեջանի նախագահ Իլհամ Ալիևն էր խոսել մոնիթորինգի կենտրոնի մասին՝ ասելով, որ Աղդամի շրջանում շարունակվում են ռուս-թուրքական համատեղ կենտրոնի շինաշխատանքները։
Ի դեպ, Ադրբեջանի նախագահը դեռևս ԵԱՀԿ Մինսկի խմբի ֆրանսիացի ու ամերիկացի համանախագահների հետ հանդիպման ժամանակ էր տեղեկացրել, որ ռուս-թուրքական համատեղ մոնիթորինգային կենտրոնը տեղակայվելու է Աղդամում։ «Մենք գտնվում ենք Աղդամի շրջանում մոնիթորինգային կենտրոնի ստեղծման փուլում։ Այդ հարցն արտացոլված է նոյեմբերի 9-ին ստորագրված հայտարարության մեջ։ Ռուս-թուրքական մոնիթորինգային կենտրոնը կհետևի հրադադարի ռեժիմի պահպանմանը»,- ասել էր Ալիևը։
Ռուսական կողմն էլ իր հերթին բազմիցս հայտարարել է, որ ռուս-թուրքական համատեղ մոտիթորինգային կենտրոնը ԼՂ-ում, նրան հարակից տարածքներում չի տեղակայվելու, այլ Ադրբեջանի տարածքում։ Փաստացի, սակայն, ստացվում է, որ այն տեղակայվում է ԼՂ-ին հարակից շրջանում։
Թուրքիայի ՊՆ-ի ու Ադրբեջանի նախագահի այս հայտարարությունները ռուսական կողմը որևէ կերպ չի մեկնաբանել։
Էմմա Չոբանյան
