Որտե՞ղ է տեղակայվելու ռուս-թուրքական մոնիթորինգի համատեղ կենտրոնը․ BBC-ի անդրադարձը

Այս շաբաթ հայտնի է դարձել, որ Ռուսաստանն ու Թուրքիան պայմանագիր են ստորագրել Ղարաբաղում հրադադարի պահպանման վերահսկման համատեղ կենտրոն ստեղծելու վերաբերյալ, սակայն համաձայնագրի մանրամասները չեն հաղորդվում։ BBC-ի ռուսական ծառայությունը փորձել է պարզել, թե որտեղ կարող է տեղակայվել այդ կենտրոնը։

Երկու ադրբեջանցի պաշտոնյա BBC-ին հայտնել են, որ Մոսկվայի հետ բանակցությունների ընթացքում ամենից շատ քննարկվել է տեղակայման վայրի երկու տարբերակ՝ Գյանջան կամ Բարդան, սակայն թուրքական կողմը դեմ է եղել Գյանջային, քանի որ այն չափազանց հեռու է գտնվում խաղաղապահների գործունեության շրջաններից։

Ռուսաստանի ու Թուրքիայի ռազմադիվանագիտական շրջանակներից  լրատվականի աղբյուրները պարզել են, որ երկու կողմերն էլ պայմանավորվել են դեռևս չհրապարակել կենտրոնի տեղակայման հստակ վայրը, այդ պատճառով էլ լրագրողների հետ զրույցում, անգամ անանուն մնալու պայմանով հրաժարվել են խոսել հստակ տեղակայման վայրի մասին, սակայն մի քանի հուշում են տվել։

Այսպես՝ Թուրքիայի հատուկ ծառայություններում BBC-ի աղբյուրը հայտնել է, որ կենտրոնը տեղակայվելու է ռուս խաղաղապահների վերահսկողության տակ գտնվող Լեռնային Ղարաբաղի տարածքից 15 կմ հեռավորության վրա։ Մոտավորապես նույն հեռավորության վրա է գտնում Բարդա քաղաքը։

Լրատվականի մեկ այլ աղբյուր էլ, պատասխանելով այն հարցին, թե արդյոք համատեղ կենտրոնը տեղակայված կլինի Բարդայում, պատասխանել է, որ «այդ մասին կարել է խոսել մեծ վստահությամբ»։

Տաթև Ֆռանգյան