18.11.2024 | 19:33
Դեռևս քննարկվում է Ուկրաինայի կողմից ՌԴ-ի խորքում հարվածների արգելքը հանելու հարցը. Ֆրանսիայի ԱԳՆ
Թուրքիան սիրիական Աֆրինում երկու գրասենյակ է բացել․ ԼՂ տարածաշրջանում բնակվել ցանկացողների են գրանցում․ Afrinpost
Քաղաքականություն
24.11.2020 | 14:46
Թուրքական իշխանությունները երկու գրասենյակ են բացել Սիրիայի հյուսիսում գտնվող Աֆրինում՝ գրանցելու համար այն ընտանիքներին, որոնք պատրաստ են տեղափոխվել Լեռնային Ղարաբաղի տարածաշրջան՝ ադրբեջանցիների կողմից գրավված տարածքներում բնակություն հաստատելու։ Այս մասին գրում է Afrinpost-ը։
Լրատվամիջոցի աղբյուրները հաստատել են, որ առաջին գրասենյակը գտնվում է Հին Աֆրին թաղամասում People Credit բանկի տարածքում, որտեղ թուրքական հետախուզությունը տեղափոխել է իր կենտրոնակայանը։ Երկրորդ գրասենյակը գտնվում է նախկին «Ronahi Press» կայքի տարածքում՝ Նոր Աֆրին թաղամասում, որը նույնպես թուրքական հետախուզության կենտրոնն է։
Ըստ աղբյուրի՝ այս գրասենյակներում գրանցում են հատկապես թուրքմեն ընտանիքների Հոմս նահանգից։ Ընտանիքների տվյալները հավաքվում են՝ նրանց Ղարաբաղի տարածաշրջան տեղափոխելու համար։
Ավելի վաղ էլ Սիրիական մարդու իրավունքների մշտադիտարկման կենտրոնն էր հայտնել, որ թուրքական հետախուզությունն Անկարային հավատարիմ «Սուլթան Մուրադ» և «Սուլեյման Շահ» խմբավորումների ղեկավարներին առաջարկել է բնակություն հաստատել Ադրբեջանում։
Ամերիկացի լրագրող Լինդսի Սնելլն էլ, որն ակտիվորեն լուսաբանում է Սիրիայում տեղի ունեցող իրադարձություններն ու ղարաբաղյան պատերազմի առաջին օրերից խոսում է Ադրբեջան ուղարկվող սիրիացի վարձկանների մասին, թվիթերյան իր էջում հայտնել էր, որ սիրիացի վարձկանները դեռ Ադրբեջանում են։
«Սիրիացի վարձկանները դեռ Ադրբեջանում են՝ բացի մեկ ամիս առաջ ուղարկված 700-ից։ Լսել եմ նաև խոսակցություններ ավելի մեծ թվով զինյալներ ուղարկելու մասին։ Սպասում եմ մանրամասներին։ Թվում էր՝ Թուրքիան ու Ադրբեջանը պիտի ցանկանային, որ նրանք արագ հեռանան, որ շարունակեն հերքել նրանց ներկայությունը, բայց, գուցե, այդպես չէ»,- գրել էր լրագրողը։
Էմմա Չոբանյան
