Քաղաքականություն
18.11.2020 | 15:10
Ադրբեջանի նախագահ Իլհամ Ալիևը կրկին խոսել է ԼՂ-ում անվտանգության ապահովմանը թուրք զինվորականների մասնակցության մասին։
Նրա խոսքով՝ տարածաշրջանի բոլոր երկրներն իրենց աջակցությունն են հայտնել Ռուսաստանի, Ադրբեջանի ու Հայաստանի ղեկավարների՝ Լեռնային Ղարաբաղի հակամարտության գոտում հրադադարի մասին համատեղ հայտարարությունը՝ հավելելով, որ ռուս և թուրք զինվորականները կմասնակցեն ԼՂ-ում «ադրբեջանցիների ու հայերի անվտանգության ապահովման օպերացիային»։
«Մեր բոլոր հարևաններն իրենց աջակցությունն են հայտնել։ Իսկ նրանցից երկուսը՝ Ռուսաստանն ու Թուրքիան, կմասնակցեն ադրբեջանցիների ու հայերի անվտանգության ապահովման օպերացիաներին»,- ասել է Ալիևը Բաքվում Նիդերլանդների նոր դեսպանի հետ հանդիպմանը, փոխանցում է ՏԱՍՍ-ը։
Հիշեցնենք, որ ավելի վաղ ռուսական կողմից բազմիցս հայտարարություններ են եղել, որ Լեռնային Ղարաբաղում թուրք խաղաղապահներ չեն լինելու՝ նշելով, որ խոսքն ընդամենը վերաբերում է Ադրբեջանի տարածքում ռուս-թուրքական դիտորդական կենտրոնի ստեղծմանը, որը Ղարաբաղին մոտ չի լինի, իսկ մանրամասները կհամաձայնեցվեն լրացուցիչ։
Տաթև Ֆռանգյան
