29.04.2026 | 13:58
Թրամփը հայտարարել է, որ Իրանը «ռազմական պարտություն է կրել»
Եվրամիության նոր նախագահը չի նախատեսում զբաղվել Թուրքիայի եվրաինտեգրմամբ
Քաղաքականություն
27.12.2017 | 14:38
2018թ. հունվարի 1-ից Եվրամիության նախագահությունը կստանձնի Բուլղարիան: Թուրքական ընդդիմադիր «T24» լրատվակայքի տեղեկացմամբ՝ առաջիկա վեց ամսվա համար Բուլղարիայի կողմից կազմված գործունեության ծրագրում որևէ անդրադարձ չի կատարվում Թուրքիա եվրաինտեգրման գործընթացին. տեղեկացնում է EH-ն:
Փոխարենը Բուլղարիան Եվրամիության ընդլայնման գործընթացում մեծ նշանակություն է տվել Արևմտյան Բալկաններին, և 2018թ. մայիսի 17-ին նախատեսված է այդ տարածաշրջանի վերաբերյալ հատուկ գագաթնաժողով անցկացնել Սոֆիայում:
«Hürriyet» -ի վերլուծաբան Գյուվեն Օզալփի խոսքով՝ Բուլղարիան բավարարվել է իր ծրագրում Թուրքիայի վերաբերյալ միայն հետևյալ ձևակերպմամբ. «ԵՄ նախագահության ընթացքում Բուլղարիան կջանա շարունակել Թուրքիայի հետ երկխոսությունն ու համագործակցությունը»: Մինչդեռ ընդլայնման գործընթացում առանցքային խնդիր է դարձել Արևմտյան Բալկաններ եվրաինտեգրման հարցը: «Ընդլայնման գործընթացում Արևմտյան Բալկաններն ու Թուրքիան միմյանցից տարանջատելու միտումը վերջին շրջանում շատ լավ նկատելի է նաև Բրյուսելի դիրքորոշման մեջ», – նկատում է Օզալփը:
Միևնույն ժամանակ՝ Բուլղարիան նաև իր աջակցությունն է հայտնել 2016թ. մարտի 18-ին Թուրքիայի և ԵՄ-ի միջև ձեռք բերված համաձայնությանը՝ ընդգծելով, որ անհրաժեշտ է հավատարիմ մնալ այդ համաձայնագրի տառին:
Միջանկյալ հիշեցնենք, որ ԵՄ անդամ-երկրների ղեկավարները և Թուրքիայի վարչապետ Ահմեթ Դավութօղլուն 20162. մարտի 18-ին համաձայնագիր էին կնքել՝ պայմանավորվելով վերադարձնել Թուրքիայով Հունաստան ժամանած բոլոր անօրինական ներգաղթյալներին՝ Թուրքիայի քաղաքացիների համար առանց վիզայի ռեժիմի, 3 մլրդ եվրոյի և Թուրքիայից սիրիացի փախստականների ԵՄ-ում ընդունելու փոխարեն:
Հավելենք, որ Բուլղարիան կողմ է Անկարայի հետ լավ հարաբերությունների պահպանմանը, սակայն առանձնապես դրական չի տրամադրված Թուրքիայի եվրաինտեգրման հարցում: Այս երկիրը Թուրքիայի հետ հարաբերությունները հնարավոր է համարում է ոչ միայն ԵՄ շրջանակներում և առաջարկում է դիտարկել երկկողմ հետաքրքրություն ներկայացնող այլ ասպեկտներ ևս:
Բուլղարիայի վարչապետ Բոյկո Բորիսովը օրեր առաջ տեղական հեռուստաընկերություններից մեկի եթերում Թուրքիայի վերաբերյալ հետևյալ մեկնաբանությունն էր արել. «Եկեք վերջ տանք Թուրքիայի ԵՄ անդամ դառնալու վերաբերյալ երկերեսանիությանը: Ավելի լավ կլինի նստենք և Թուրքիայի ու ԵՄ-ի միջև հատուկ պայմանագիր ստորագրենք»:
