18.09.2026 | 19:29
Վարչապետը Ֆրանկֆուրտի արդյունաբերության և առևտրի պալատում հանդիպում է ունեցել տեղի գործարարների հետ
Թուրքիան ահաբեկիչների նոր խմբաքանակ է ուղարկում ԼՂ հակամարտության գոտի՝ զինյալների փախուստից հետո. SOHR
Քաղաքականություն
03.11.2020 | 19:37
Թուրքիան ահաբեկիչների նոր խմբաքանակ է ուղարկում Ադրբեջան, քանզի Ադրբեջանից Սիրիա են վերադառնում ավելի շատ թվով զինյալներ։ Մարդու իրավունքների հարցերով սիրիական կենտրոնը (SOHR), վկայակոչելով իր սեփական աղբյուրներին, հայտնում է, որ 230 սիրիացի զինյալներից կազմված նոր խումբն ուղարկվել է Ադրբեջան՝ Լեռնային Ղարաբաղում շարունակվող մարտերին մասնակցելու համար։
Ընդ որում, առնվազն 22 զինյալ արդեն փախուստի է դիմել Ադրբեջանից։ Կենտրոնի տվյալներով՝ այս ընթացքում սպանվել է 240 զինյալ, որոնցից 183-ի աճյունները տեղափոխվել են Սիրիա, մյուսները մնացել են Ադրբեջանում։ Բացի այդ, հայկական կողմը գերեվարել է 3 սիրիացի զինյալի։
SOHR-ի հաշվարկների համաձայն՝ այս պահին Լեռնային Ղարաբաղում կռվող զինյալների թիվը հասել է 2580-ի, որոնցից 342-ը վերադարձել է Սիրիա՝ իրենց խոստացված վճարները չստանալու պատճառով։
Կենտրոնի ստացած այլ տեղեկություններով էլ՝ վերջին մի քանի ժամվա ընթացքում Լեռնային Ղարաբաղի մարտերում 9 սիրիացի վարձկան է սպանվել։
Ուշագրավ է, որ Թուրքիան ավելի շատ ջանք է թափում Լեռնային Ղարաբաղի հակամարտության գոտի զինյալների ուղարկելու համար, սակայն նրանց մեծ մասը հրաժարվում է կռվել Ադրբեջանի կողմից՝ կրոնական նկատառումներից ելնելով, ինչպես նաև իրենց հայրենակիցների շարքերում բազմաթիվ զոհերի պատճառով։
Տաթև Ֆռանգյան
