04.03.2026 | 12:13
Հայկ Կոնջորյանի ճեպազրույցը՝ ՈՒՂԻՂ
Դրեզդենում ձերբակալվել է անցորդների վրա դանակով հարձակված իսլամիստը
Քաղաքականություն
21.10.2020 | 17:52
Գերմանիայի իրավապահները Դրեզդենում ձերբակալել են ոստիկանության ուշադրության տակ արդեն հայտնված իսլամիստի, որը երկու շաբաթ առաջ դանակով հարձակվել էր երկու զբոսաշրջիկի վրա, որոնցից մեկը մահացել էր հիվանդանոցում, մյուսը՝ ծանր վիրավորվել, գրում է Der Spiegel-ը։
Տեղեկացվում է, որ 20-ամյա չարագործը Սիրիայի քաղաքացի է, Գերմանիա է ժամանել 2015 թվականին, սակայն ապաստան տրամադրելու նրա դիմումը մերժվել է։
Իրավապահ մարմինների տեղեկությունների համաձայն՝ վերջինը դատապարտվել էր 2 տարվա ազատազրկման՝ պետական անվտանգությանը սպառնացող հանցագործության համար։ Մասնավորապես, նա կասկածվել է «Իսլամական պետություն» ահաբեկչական խմբավորմանը նոր անդամների հավաքագրման մեջ։
Նշենք, որ անցած շաբաթ էլ Եվրոպան ցնցվեց Փարիզի արվարձանում ուսուցչի սպանության լուրից։ Հոկտեմբերի 16-ին խոհանոցային դանակով զինված մի երիտասարդ հարձակվել էր դպրոցի մոտ գտնվող ուսուցչի վրա, որտեղ վերջինը պատմություն էր դասավանդում։ Չարագործը գլխատել էր ուսուցչին, իսկ հետո դանակով սպառնացել դեպքի վայր ժամանած ոստիկաններին։ Ահաբեկիչը չեզոքացվել էր ոստիկանների կողմից։
Տաթև Ֆռանգյան
