01.07.2026 | 02:54
ԱԱ-2026. Ֆրանսիան խնդիրներ չունեցավ, Մբապեի դուբլը. ՏԵՍԱՆՅՈՒԹ
ԼՂ հակամարտության սրացումից հետո Ադրբեջանում ինտերնետ կապի սահմանափակումը կյանքեր է վտանգում․ Аccess now
Քաղաքականություն
16.10.2020 | 15:27
Սեպտեմբերի 27-ին Լեռնային Ղարաբաղի շուրջ Հայաստանի ու Ադրբեջանի միջև ինտենսիվ մարտերի մեկնարկին զուգընթաց՝ Ադրբեջանի կառավարությունը հայտարարեց, որ սահմանափակվում է ինտերնետ կապի հասանելիությունը։
Անձանց թվային իրավունքների պաշտպանությամբ զբաղվող Аccess now կազմակերպությունը նշում է, որ դեռևս ինտերնետի սահմանափակումների մասին հայտարարելուց մեկ օր առաջ Ադրբեջանում օգտատերերը սկսեցին հայտնել համացանցի արագության նվազման մասին։
Նշվում է, որ դա բարդացնում էր բովանդակության հասանելիությունն ու դրանով կիսվելու հնարավորությունը, ինչը կարևոր է մարդու իրավունքների ու մարդասիրական խնդիրների փաստագրման տեսանկյունից։ Սա նաև հնարավորություն չի տալիս լրագրողներին հրատապ լուրեր հրապարակել, միաժամանակ, անհասանելի են դարձել որոշ պաշտոնական կայքեր։ Տեղեկացվում է, որ մարդիկ զրկվել են սոցկայքերին հասանելիությունից։
Аccess now-ի հրապարակման համաձայն՝ ինտերնետի անջատումը սահմանափակում է կենսական տեղեկատվության հասանելիությունը, թույլ չի տալիս մարդկանց շփվել մտերիմների հետ, սահմանափակում է արտակարգ ծառայությունների աշխատանքի արդյունավետությունը և ճնշում մարդու իրավունքների խախտումների մասին հաղորդագրությունները։
«Նախագահ Իլհամ Ալիևի ղեկավարությամբ, որն իշխանության եկավ 2003 թվականին՝ իր հորից հետո, Ադրբեջանի իշխանությունները տեղեկատվության ազատ հոսքը ճնշելու և քննադատական ձայները լռեցնելու երկար պատմություն ունեն։ Միայն անցած շաբաթ ոստիկանությունը ձերբակալել է մի քանի տասնյակ ցուցարարների, որոնք բողոքում էին ընդիմադիր քաղաքական գործիչների ձերբակալության դեմ»,- ասվում է հոդվածում։
Ըստ հրապարակման՝ հետազոտությունները ցույց են տալիս, որ գոյություն ունի ինտերնետի անջատումների և պատերազմի ու բախումների ընթացքում մարդկանց հանդեպ անխտիր բռնության միջև կապ:
«Մենք կոչ ենք անում ԵԱՀԿ Մինսկի խմբի համանախագահներին՝ բանակցային գործընթացում ներառել ինտերնետային անջատումների, տեղեկատվության մատչելիությունն ու խոսքի ազատությունը ճնշելու անթույլատրելիությունը՝ ինչպես ներկայիս հակամարտության ընթացքում, այնպես էլ դրանից հետո»,- ասվում է կազմակերպության կայքի հրապարակման մեջ:
Տաթև Ֆռանգյան
