«Իմ որդուն խոշտանգել են, հետո սպանել»․ Արմեն Աղաջանյանի մայրը չի հավատում ինքնասպանության վարկածին. ՏԵՍԱՆՅՈՒԹ

Երկու տարի առաջ, ըստ պաշտոնական վարկածի, կալանավոր Արմեն Աղաջանյանն ինքնասպանություն էր գործել, ու այժմ նրա մայրը մտավախություն ունի, որ կատարվածի առնչությամբ հարուցված քրեական գործը իրավապահները ցանկանում են կոծկել։

31-ամյա Արմեն Աղաջանյանը 2018 թվականին կալանավորվելուց և «Նուբարաշեն» ՔԿՀ տեղափոխվելուց հետո, հարազատների պնդմամբ, ենթարկվել է խոշտանգման, իսկ 4 ամիս անց նրա մարմինը գտել են «Հոգեկան առողջության պահպանման ազգային կենտրոնի» լոգարանում կախված։

Մահացած Արմեն Աղաջանյանի մայրը նշում է, որ  որդին «ինչ-որ մեքենայի առքուվաճառքի» հարցով նախնական կալանքի տակ է եղել, նրա մեղսունակությունը ճանաչելու համար՝ խոշտանգվելուց որոշ ժամանակ անց, ՔԿՀ-ից տեղափոխել են «Հոգեկան առողջության պահպանման ազգային կենտրոն» և մի քանի օր հետո լոգարանում կախված են գտել:

Մոր ներկայացմամբ՝ խոշտանգման գործն ավարտվել է Արմեն Աղաջանյանի սպանությամբ։ Աղաջանյանի, թե՛ մայրը, թե՛ փաստաբանը պնդում են, որ խոշտանգման գործի քննությունը ճիշտ ուղղությամբ չի ընթանում, և վարույթն իրականացնող մարմնինը փորձում է կոծկել այն։

Այս գործով ամբաստանյալի աթոռին երկու անձ կա, որոնցից մեկը՝ «Նուբարաշեն» ՔԿՀ-ի նախկին աշխատակից Արմեն Հովհաննիսյանը, համաներմամբ ազատ է արձակվել, իսկ մյուսի գործը նոր է դատարան մտել։

Փաստաբանի խոսքով՝ խոշտանգման, ինքնասպանության վերաբերյալ գործերը անգամ հեղափոխությունից հետո մեր երկրում պատշաճ վերահսկողության չեն արժանանում։ Խոշտանգման գործով մեղադրող դատախազ Գուրգեն Սաֆարյանին փոխելու պահանջով Գայանե Աղաջանյանը դիմել է Գլխավոր դատախազությանը, եթե իրեն մերժեն՝ առաջիկա դատական նիստին նաև ինքաբացարկի միջնորդություն կներկայացնի։

Գլխավոր դատախազությունից մեզ տեղեկացրին, որ մոր դիմումը քննարկել են և պատասխանել, այլ մանրամասներ, սակայն, չհաղորդեցին։

Մանրամասները՝ տեսանյութում։

Լիլիթ Շաբոյան