Ջուլֆալակյանի տարաձայնությունը հիմնականում ԿԳՄՍ փոխնախարարի հետ էր, որը համակարգում է սպորտը. Հովսեփյան. ՏԵՍԱՆՅՈՒԹ

«Արսեն Ջուլֆալակյանի քայլն ինձ համար անակնկալ էր, գիտեի, որ իր համար ոչ կոմֆորտ վիճակ է ստեղծվել, բայց որ այսպիսի հանգուցալուծում կտրվի, չէի սպասում»,- այսօր խորհրդարանում լրագրողների հետ զրույցում ասաց «Իմ քայլը» խմբակցության պատգամավոր, ԱԺ գիտության, կրթության, մշակույթի, սփյուռքի, երիտասարդության և սպորտի հարցերի հանձնաժողովի անդամ Սոֆյա Հովսեփյանը՝ անդրադառնալով Արսեն Ջուլֆալակյանի՝ պատգամավորական մանդատը վայր դնելու մասին որոշմանը:

Հիշեցնենք՝ երեկ հունահռոմեական ոճի ըմբիշ, աշխարհի չեմպիոն, «Իմ քայլը» խմբակցության պատգամավոր Արսեն Ջուլֆալակյանն իր ֆեյսբուքյան էջում գրառում էր կատարել՝ տեղեկացնելով պատգամավորական մանդատը վայր դնելու որոշման մասին և նշել, որ իր այդ քայլի պատճառը ԿԳՄՍ նախարար Արայիկ Հարությունյանի հետ ունեցած սկզբունքային անհամաձայնություններն են՝ նրա ենթակայության տակ գտնվող ոլորտների կառավարման մոտեցումների վերաբերյալ:

Սոֆյա Հովսեփյանի խոսքով՝ ԱԺ գիտության, կրթության և մշակույթի հարցերի հանձնաժողովը մի շարք տարաձայնություններ է ունեցել ԿԳՄՍ նախարարության հետ:

«Պարոն Ջուլֆալակյանը հիմնականում տարաձայնություններ է ունեցել ԿԳՄՍ փոխնախարար Գրիշա Թամրազյանի հետ, ով սպորտն է համակարգում: Այս խնդիրը բավականին երկար ժամանակ առկա է, միգուցե հաղորդակցումը պատշաճ մակարդակով չի եղել: ԿԳՄՍ նախարար Արայիկ Հարությունյանի և Արսեն Ջուլֆալակյանի միջև ակնհայտ խնդիր չի դրսևորվել հանձնաժողովի նիստերում քննարկումների ժամանակ»,- նշեց պատգամավորը:

Մանրամասները՝ տեսանյութում: