18.11.2024 | 09:50
Սասուն Խաչատրյանը հրաժարականի դիմում է ներկայացրել. Կոմիտեն պաշտոնապես հաստատեց
Գյումրու ինֆեկցիոնի կորոնավիրուսով հիվանդներին տեղափոխում են Երևան․ հիվանդանոցն անցնում է բնականոն աշխատանքի
Հասարակություն
31.08.2020 | 14:12
Գյումրու ինֆեկցիոն հիվանդանոցում բուժվող կորոնավիրուսով հիվանդներին տեղափոխում են Երևանի բուժհաստատություններ։ Այժմ ընթանում է հիվանդների տեղափոխման գործընթացը։ Այս մասին մեզ հետ զրույցում ասաց Շիրակի մարզպետարանի առողջապահության և սոցիալական ապահովության վարչության պետի ժամանակավոր պաշտոնակատար Լեյլի Ասլանյանը։ Նա նշեց, որ հիվանդներին տեղափոխում են նախարարի հրամանով։
«Սեպտեմբերի 1-ից կորոնավիրուսային վարակով վերապրոֆիլավորված մարզային կենտրոնների գործունեությունը դադարեցվում է»,- ասաց Լեյլի Ասլանյանը։
Այժմ կորոնավիրուսով 55 հիվանդ է բուժվում Գյումրու ինֆեկցիոնում, ըստ պատասխանատուի՝ տեղափոխման հակացուցում ունեցող հիվանդներ չկան։
Գյումրու ինֆեկցիոն հիվանդանոցը կանցնի բնականոն աշխատանքի՝միաժամանակ իրականցնելով նաև տրիաժի գործառույթ։
«Տրիաժի գործառույթ է իրականացնելու ինֆեկցիոն հիվանդանոցը, այսինքն՝ կասկածելի դեպքերի ընդունում, հայտնաբերում, եթե կարիք լինի ստացիոնար բուժման կտեղափոխվեն Երևան»,- ասաց Լեյլի Ասլանյանը։
Նշենք, որ Գյումրու ինֆեկցիոն հիվանդանոցը մարտի 17-ից էր վերապրոֆիլավորվել ու սպասարկում էր կորոնավիրուսով հիվանդներին։
Հավելենք, որ Շիրակի մարզպետարանի հրապարակած վերջին տվյալներով՝ մարզում տնային ինքնամեկուսացման ցուցում ունի 586 քաղաքացի, նրանցից 131-ի մոտ դրական ախտորոշում կա՝ հիվանդության անախտանիշ ընթացքով։ Նրանց հսկողությունն իրականացվում է առողջության առաջնային օղակի կողմից։
Կորոնավիրուսից էլ առողջացել և Գյումրու ինֆեկցիոն հիվանդանոցից մինչ օրս դուրս է գրվել Շիրակի մարզի 537 բնակիչ։ Ընդհանուր առմամբ, արձանագրվել է մահվան 40 դեպք։
