Արդյունագործական ձկնորսության նոր կարգի գործադրումը կսկսի վաղ առավոտյան․ նախարար. ՏԵՍԱՆՅՈՒԹ

Վաղ առավոտյան կմեկնարկի արդյունագործական ձկնորսության նոր կարգի գործադրումը։ Այս մասին այսօր ուղիղ եթերի ժամանակ հայտարարեց Շրջակա միջավայրի նախարար Ռոմանոս Պետրոսյանը։

Նախարարը նշեց, որ Սևանա լճի էկոհամակարգի փրկությունը ազգային խնդիր է, համազգային մարտահրավեր, որն օր առաջ պետք է լուծվի։

«Այս փուլում Սևանա լիճը էկոհամակարգի խեղման արդյունքում և հիմնականում մարդածին գործոնների ազդեցության տակ, կարծես թե, կորցնելու վտանգի առաջ է կանգնած։ Կապտականաչ ջրիմուռներն են ակտիվացել , և իրավիճակը օրըստօրե ավելի վատթարանում է՝ պայմանավորված ափամերձ տարածքներում այն խառնափնթոր շինարարությամբ, հազարավոր ապօրինի շենք-շինությունների գործունեությամբ, տնտեսվարությամբ նաև»,- նշեց նախարարը։

Վերջինիս խոսքով՝ բացի արդյունագործական ձկնորսության նոր կարգի ներդրումից, այս պահին մի քանի այլ գործընթացներ են իրականացվում՝ ուղղված Սևանի էկոհամակարգի փրկությանը:

«Գույքագրում է գնում ափամերձ շրջանների՝ ծովի մակարդակից բարձր 1903,5 + 1,5 նիշից ցածր գտնվող բոլոր շենք շինությունների մասով, ինչպես նաև վերլուծություններ և գույքագրումներ են կատարվում Սևանա լճի ափամերձ տարածքներում տնտեսվարողների ձեռքին գտնվող այդ հողատարածքների նկատմամբ, վերջիններիս իրավական կարգավիճակների, դրանց իրավաչափության, ժամկետների, այդ պայմանագրերի երկուստեք սահմանված պարտավորությունների կատարման, ավելի շատ չկատարման վերաբերյալ։ Վերլուծություններ և գույքագրումներ են կատարվում նաև այն տնտեսվարողների նկատմամբ հետագա վերաբերմունքի վերաբերյալ, որոնք որևէ իրավական կարգավիճակ չունեն Սևանա լճի ափամերձ՝ իրենց տնօրինման տակ գտնվող տարածքների նկատմամբ, որտեղ տնտեսվարում են վերջիններս և որոնց տնտեսվարման արգասիքը ուղղակիորեն ազդում է Սևանա լճի էկոհամակարգի վատթարացման վրա»,- նշեց նախարարը։

Մանրամասները՝ տեսանյութում։