25.04.2026 | 21:33
Մանվել Խնձրցյանը և Վազգեն Թևանյանը տպավորիչ հաղթանակներով դարձան ԵԱ-ի բրոնզե մեդալակիրներ. ՏԵՍԱՆՅՈՒԹ
8,85 մլն դոլար՝ «Լիճք» ենթակայանի վերակառուցմանը. «Սա Արցախի էներգետիկ անվտանգության հետ է կապված». ՏԵՍԱՆՅՈՒԹ
Տնտեսություն
09.07.2020 | 13:01
Կառավարությունն այսօրվա նիստում որոշում կայացրեց թույլատրել «Բարձրավոլտ էլեկտրացանցեր» փակ բաժնետիրական ընկերությանը «Լիճք» ենթակայանի վերակառուցման աշխատանքներն իրականացնելու նպատակով «Կասկադ-էներգո» ՍՊԸ-ի հետ 8 857 600 ԱՄՆ դոլար արժեքով պայմանագրի կնքումը:
Հարցը ներկայացրեց Տարածքային կառավարման և ենթակառուցվածքների նախարար Սուրեն Պապիկյանը՝ նշելով, որ հրատապությունը պայմանավորված է նրանով, որ վերջերս կառավարության կողմից հավանության է արժանացել «Մասրիկ-1» արևային ենթակայանի կառուցումը, իկ արտադրված էլեկտրաէներգիան պետք է ընդունվի «Լիճք» կայանի միջոցով:
«Այս պահին «Լիճքը» ի վիճակի չէ սա իրականացնել, որովհետև այդ կայանը շահագործման է հանձնվել 1961 թվականին և այստեղ շինարարական աշխատանքների կարիք կա: Հաշվի առնելով, որ «Մասրիկ-1»-ի ֆինանսավորումը մեր կողմից արդեն հաստատվել է, շուտով կսկսվի շինարարությունը, մեր կողմից հրատապ քայլեր են պետք, որ ավարտենք «Լիճքը»: «Լիճքի» շինարարությունը պետք է իրականացվի «ԲԷՑ»-ի միջոցների հաշվին: Սա ևս աննախադեպ է, նախկինում բոլոր մեր ենթակայանները վերակառուցվել ու կառուցվել են վարկային միջոցների հաշվին»,- ասաց Պապիկյանը՝ հավելելով, որ իրենք գնային առաջարկներ են ուղարկել նման կայանների կառուցման հաջողված փորձ ունեցող կազմակերպություններին:
«Միակ արձագանքը «Կասկադ Էներգո»-ի կողմից է եղել: Նախնական առաջարկը կազմել է 9 998 232 ԱՄՆ դոլար: Այս փուլում առաջարկում ենք թույլ տալ «Բարձրավոլտ էլեկտրացանցեր»-ին այդ աշխատանքներն իրականացնելու նպատակով «Կասկադ-էներգո» ՍՊԸ-ի հետ 8 857 600 ԱՄՆ դոլար արժեքով պայմանագրի կնքել»,- ասաց Պապիկյանը՝ հավելելով, որ սա նաև Արցախի էներգետիկ անվտանգության հետ կապված կարևոր դերակատարում ունեցող ենթակայան է:
Նախարարը հավելեց, որ տեխնիկապես հնարավոր է 6-8 ամսում շինարարական աշխատանքները կատարել: Իր հերթին վարչապետ Նիկոլ Փաշինյանը պարզաբանեց, թե ինչով է պայմանավորված հրատապությունը. «Պայմանագի համաձայն, այն պահին, երբ «Մասրիկ-1» կայանը սկսի էլեկտրաէներգիա արտադրել, ՀՀ-ն պարտավոր է այդ էլէներգիան ձեռք բերել, բայց եթե նույնիսկ ձեռք չբերի, պարտավոր է դրա համար վճարել: Դրա համար պետք է սինխրոնացնենք «Մարսիկի» և «Լիճք» ենթակայանի շահագործման ժամկետները, որ Հայաստանը վնասներ չկրի»:
Մանրամասները՝ տեսանյութում:
