14.12.2025 | 21:40
Ոստիկանությունը ձերբակալել է Բրաունի համալսարանում կրակ բացելու մեջ կասկածվողին
Նիկոլ Փաշինյանին անվստահություն հայտնելու նախաձեռնություն․ Էդգար Ղազարյանը նամակներ փոխանցեց պատգամավորներին
Քաղաքականություն
28.04.2025 | 18:42
«Արթուն ենք» քաղաքացիական շարժման անդամներն այսօր Ազգային ժողովի բակում էին։ Շարժման անդամ, հասարակական գործիչ Էդգար Ղազարյանը խորհրդարանի բոլոր պատգամավորներին ուղղված նամակներ հանձնեց՝ վարչապետ Նիկոլ Փաշինյանին անվստահության գործընթաց սկսելու խնդրանքով։ Նա լրագրողների հետ ճեպազրույցում ասաց, որ սա անհատական պատասխանատվության հարց է, դրա համար բոլոր 107 պատգամավորներին առանձին են դիմում։
Էդգար Ղազարյանի խոսքով՝ Նիկոլ Փաշինյանին անվստահություն հայտնելու գործընթաց պետք է սկսվի։
«ՔՊ-ական ու ընդդիմադիր պատգամավորներին ենք հանձնում նամակներ՝ Փաշինյանի իմպիչմենտի պահանջով։ Անվստահություն հայտնելու որոշման տեքստը գրված է, բայց բաց է թողնված վարչապետի անունը լրացնելու տեղը՝ նկատի ունենալով, որ նախաձեռնության հեղինակ պատգամավորների իրավունքն է առաջադրել վարչապետի թեկնածու»,- ասաց Ղազարյանն՝ ընդգծելով, եթե իմպիչմենտի համար պետք է հանրային աջակցություն, ապա կոչով հանդես կգան, որ մարդիկ հավաքվեն։
Նախաձեռնության հեղինակ Ղազարյանը նաև նշեց, թե ակնկալում են, որ առաջիկա 10 օրվա ընթացքում պատգամավորները որոշում կայացնեն։
Հիշեցնենք, որ վերջերս ԱԺ «Հայաստան» խմբակցության պատգամավոր Իշխան Սաղաթելյանը լրագրողների հետ ճեպազրույցում անդրադառնալով քննադատություններին, թե ինչու իմպիչմենտի գործընթաց չեն սկսում հայտարարել էր՝ «այդ գործիչները նաև իրենց թույլ են տալիս ասելու, որ մենք դեմ ենք իմպիչմենտին՝ մոռանալով, որ իմպիչմենտի մասին առաջինը ես եմ հայտարարել՝ դեռ 2022թ․ օգոստոսին, բացատրել ընթացակարգը։ Մենք ոչ միայն դեմ չենք, այլև՝ պատրաստ ենք խոսելու, քննարկելու և բավարար անհրաժեշտ պայմաններ լինելու դեպքում սկսելու այդ գործընթացը»։
Մանյա Պողոսյան
