Առցանց համերգներ՝ նվիրված արտակարգ իրավիճակում աշխատող բուժաշխատողներին

ՀՀ ԿԳՄՍ նախարարության ենթակայությամբ գործող համերգային կազմակերպությունները հանդես են գալիս առցանց համերգներով. այդպիսով, երաժշտախմբերը բոլորի անունից երախտագիտություն են հայտնում այս օրերին բազմաթիվ կյանքերի համար պայքարող բուժաշխատողներին: Համերգների ընթացքում պահպանվում են պարետի ցուցումներին համապատասխան անվտանգության և հակահամաճարակային բոլոր կանոնները։

Հայաստանի ազգային ակադեմիական երգչախմբի կազմից 10 երգիչ մաեստրո Հ. Չեքիջյանի ղեկավարությամբ՝ հունիսի 17-ին, Գառնիի տաճարում կատարել են Մ. Եկմալյանի «Ո՛վ, հայոց աշխարհ» ստեղծագործությունը և հատվածներ Կոմիտասի երգաշարից։ Համերգը հեռարձակվել է Հայաստանի ազգային ակադեմիական երգչախմբի ֆեյսբուքյան էջով, այն կտեղադրվի նաև երգչախմբի պաշտոնական կայքէջում: Համերգի տևողությունը՝ 20 րոպե:

Ա. Սպենդիարյանի անվան օպերայի և բալետի ազգային ակադեմիական թատրոնի առցանց համերգի ընթացքում հնչել են արիաներ և զուգերգեր Պուչինիի օպերաներից: Համերգին մասնակցել են թատրոնի 11 մեներգիչ և 2 դաշնակահար: Հեռարձակումը տեղի է ունեցել Օպերային թատրոնի պաշտոնական ֆեյսբուքյան էջով՝ հունիսի 18-ին, ժամը 20։00-ին: Համերգը նկարահանվել է թատրոնի դահլիճում: Նկարահանման ընթացքում բեմում միաժամանակ գտնվել են առավելագույնը 7 անձ: Համերգի տևողությունը՝ 60 րոպե:

Հայաստանի ազգային ֆիլհարմոնիկ նվագախումբն իր ‹‹Ուրբաթօրյա ֆիլհարմոնիկ›› համերգաշարի գալիք համերգը կնվիրի բուժաշխատողներին: Հունիսի 19-ին, ժամը 20:00-ին համերգը կհեռարձակվի ՀԱՖՆ-ի պաշտոնական ֆեյսբուքյան էջով: ՀԱՖՆ-ի երաժիշտները Արամ Խաչատրյան համերգասրահում կկատարեն Անտոնիո Վիվալդիի Սոլ մինոր կոնցերտը (RV 105) և Յոհան Սեբաստիան Բախի Տրիո սոնատը (BWV 1039)՝ 6 և 4 երաժիշտներից բաղկացած անսամբլներով: Համերգի տևողությունը՝ 30 րոպե:

Հայաստանի պետական Ջազ նվագախմբի կազմից 6 երաժիշտ՝ մաեստրո Արմեն Հյուսնունցի մասնակցությամբ հունիսի 21-ին, ժամը 19:00-ին, Հայաստանի ճարտարապետների միության դահլիճում կկատարեն հայ հեղինակների հայտնի մեղեդիների մշակումներ: Երաժիշտները ելույթ են ունենալու սոցիալական հեռավորությունը պահպանելով։ Համերգը կհեռարձակվի Հայաստանի պետական Ջազ նվագախմբի պաշտոնական ֆեյսբուքյան էջով, այնուհետև, կտեղադրվի նվագախմբի պաշտոնական կայքէջում: Համերգի տևողությունը՝ 25-30 րոպե:

Կամերային երաժշտության ազգային կենտրոնը հունիսի 21-ին կներկայացնի առցանց համերգ՝ նվիրված Բուժաշխատողի օրվան։ «Շնորհակալություն մեր հերոս բուժաշխատողներին» խորագրով առցանց համերգն անցկացվելու է բացօթյա՝ Կոմիտասի անվան կամերային երաժշտության տան պատշգամբում: Համերգին փոքր՝ 10 հոգանոց կազմերով հանդես կգան Հայաստանի պետական կամերային նվագախումբը, Հայաստանի պետական կամերային երգչախումբը, հնագույն երաժշտության «Տաղարան» համույթը, «Հովեր» պետական կամերային երգչախումբը և Երևանի պետական կամերային երգչախումբը։ Համերգին կներկայացվեն հայ և արտասահմանյան կոմպոզիտորների ստեղծագործություններ։ Այն կհեռարձակվի հունիսի 21-ին, ժամը 21։00-ին, Կամերային երաժշտության ազգային կենտրոնի պաշտոնական ֆեյսբուքյան էջով։ Համերգի տևողոթյունը՝ 80 րոպե:

Հայաստանի պետական սիմֆոնիկ նվագախումբը հուլիս ամսվա ընթացքում 2 առցանց համերգ կնվիրի բուժաշխատողներին: Համերգները կհեռարձակվեն նվագախմբի պաշտոնական ֆեյսբուքյան էջով: Համերգին կներկայացվեն հայ և արտասահմանյան կոմպոզիտորների ստեղծագործություններ։