08.11.2024 | 21:44
ԵՄ-ն կշարունակի Ուկրաինայի զինված ուժերի վարժական առաքելությունը
Լիբանանում անկարգությունների մի քանի տասնյակ մասնակից է ձերբակալվել․ նախագահ Աունը կոչ է արել վերջ դնել վանդալիզմին
Քաղաքականություն
16.06.2020 | 20:43
Լիբանանյան բանակի զինծառայողները հատուկ գործողություն են իրականացրել՝ ձերբակալելու Տրիպոլի քաղաքում անկարգությունների և զինծառայողների վրա հարձակումների մասնակիցներին։ Այս մասին գրում է ՏԱՍՍ-ը՝ վկայակոչելով Al Wataniya պարբերականը։
Աղբյուրի տեղեկություններով՝ 36 մարդ է ձերբակալվել, բոլորն էլ պատասխանատվության կենթարկվեն։
Անկարգությունների մասնակիցների դեմ վճռական միջոցներ ձեռնարկելու պահանջ է ներկայացրել Լիբանանի նախագահ Միշել Աունը։ Երկրի Պաշտպանության բարձրագույն խորհրդի նիստում ունեցած ելույթում նա ուժային կառույցներին կոչ է արել «վերջ դնել Բեյրութի և Տրիպոլիի փողոցներում վանդալիզմին»։
Եթե մայրաքաղաքում ոստիկանների և բողոքի ակցիայի մասնակիցների միջև հունիսի 6-ի և 11-ի բախումներից հետո իրադրությունը փոքր-ինչ հանդարտվել է, ապա հյուսիսային Տրիպոլի քաղաքում անկարգությունները շարունակվում են։ Կիրակի լույս երկուշաբթի գիշերը փողոցային բախումների ընթացքում 120 մարդ է տուժել, այդ թվում՝ շուրջ 40 ոստիկան և զինվորական։
L’Orient-Le Jour պարբերականը, միաժամանակ, հաղորդում է, որ հիմնականում սուննի մահմեդականներով բնակեցված այս քաղաքում բողոքի ակցիաների հետևում կանգնած են ընդդիմադիր երկու խմբավորումների կողմնակիցները։ Նրանցից մեկը գլխավորում է նախկին վարչապետ Սաադ Հարիրիի եղբայրը՝ գործարար Բախա Հարիրին, իսկ «Քաղաքի պահապաններ» անվանումով կազմակերպությունը համակարգում է արդարադատության նախկին նախարար Աշրաֆ Ռիֆին։
Երկու ընդդիմադիր քաղաքական գործիչներն էլ իշխող խորհրդարանական կոալիցիայի հակառակորդներն են և պահանջում են վերականգնել սուննիների, շիաների և քրիստոնյաների միջև լիազորությունների բաշխման հավասարակշռությունը։ Նրանք նաև պահանջում են անցումային կառավարություն ձևավորել և արտահերթ ընտրություններ անցկացնել։ Նշենք, որ Լիբանանի հարանվանությունների կարգի համաձայն՝ նախագահի պաշտոնը պատկանում է տեղի քրիստոնյաների շրջանում մեծամասնություն կազմող մարոնիներին, վարչապետի պաշտոնը՝ սուննիներին, խորհրդարանի խոսնակինը՝ շիաներին։
Մինչ այդ, հունվարի 21-ին ձևավորված կառավարության ղեկավար Հասան Դիաբը հայտարարել է, որ Բեյրութում և Տրիպոլիում անկարգությունները «ներքին և արտաքին խաղացողների պառակտիչ գործողությունների հետևանք են, որոնք ձգտում են ապակայունացնել իրավիճակը»։
