02.07.2026 | 06:06
ԱԱ-2026. ԱՄՆ-ի հավաքականը շարժվում է առաջ. ՏԵՍԱՆՅՈՒԹ
Հայաստանում գրանցված 6 ավիաընկերության գործունեությունը ԵՄ օդային տարածքում արգելվել է
Տնտեսություն
02.06.2020 | 19:56
Եվրահանձնաժողովն այսօր թարմացրել է ԵՄ օդային անվտանգության ցուցակի այն ավիաընկերությունների ցանկը, որոնք ենթակա են Եվրամիության ներսում գործողության արգելքի կամ գործողության սահմանափակումների, քանի որ չեն բավարարում անվտանգության միջազգային չափանիշները:
Ըստ թարմացված ցուցակի, ընդհանուր առմամբ, 96 ավիաընկերության գործունեությունը Եվրամիության օդային տարածքում արգելում է։ Դրանց շարքում են Հայաստանում գրանցված հետևյալ ավիաընկերությունները․ «Հայաստան» ավիաընկերություն (Aircompany Armenia), «Հայաստան» ավիաուղիներ (Armenia Airways), Հայկական ուղղաթիռներ (Armenian Helicopters), Ատլանտիս հայկական ավիաուղիներ (Atlantis Armenian Airways), Ատլանտիս եվրոպական ավիաուղիներ (Atlantis European Airways), Մարս ավիա (Mars avia) և Սքայբոլ (Skyball)։
Եվրահանձնաժողովի հրապարակած պաշտոնական փաստաթղթում նշվում է , որ այսօրվա թարմացումից հետո Հայաստանում հավաստագրված բոլոր ավիաընկերությունները ավելացվել են այդ ցուցակ՝ երկրի անվտանգության վերահսկողության հնարավորությունների հետագա գնահատումից հետո:
Այս որոշումը հետևել է Հայաստանի Քաղաքացիական ավիացիայի կոմիտեի և 6 հայկական ավիափոխադրողների լսումներին: Միաժամանակ, ընդգծվում է, որ հանձնաժողովը ցանկանում է Եվրոպական միությունում ճանապարհորդող բոլոր ուղևորների համար ապահովել օդային անվտանգության ամենաբարձր մակարդակը։
Եվրահանձնաժողովի տրանսպորտի հարցերով հանձնակատար Ադինա Վալեանն այս կապակցությամբ նշել է․ «ԵՄ օդային անվտանգության ցուցակը պետք է կիրառվի որպես գործիք, որն օգնում է ավիաընկերություններին և ցուցակագրվող երկրներին վերագնահատել և բարելավել իրենց թռիչքային չափանիշները:
Հայաստանյան փոխադրողներին այս ցանկ ներառելու որոշումը հիմնված է օդային անվտանգության կոմիտեի ներկայացրած անանուն կարծիքի վրա։ Հանձնաժողովը, Եվրոպական միության ավիացիոն անվտանգության գործակալության աջակցությամբ, պատրաստ է համագործակցել և ներդրումներ կատարել Հայաստանում ՝ ավիացիոն անվտանգության բարելավման համար»:
Եվրահանձնաժողովի պաշտոնական կայքում հրապարակված հայտարարության մեջ ասվում է, որ ԵՄ օդային անվտանգության ցուցակը ոչ միայն օգնում է պահպանել ԵՄ-ում անվտանգության բարձր մակարդակ, այլ նաև օգնում է տուժած ավիաընկերություններին և երկրներին բարելավել իրենց անվտանգության մակարդակը, որպեսզի վերջիններս հանվեն այդ ցուցակից:
Բացի այդ, ԵՄ օդային անվտանգության ցուցակը դարձել է հիմնական կանխարգելիչ գործիք, քանի որ այն դրդում է անվտանգության խնդիրներ ունեցող երկրներին՝ դրանց կապակցությամբ գործողություններ ձեռնարկել՝ մինչ ԵՄ օդային անվտանգության ցուցակի կողմից ենթադրվող արգելքն անհրաժեշտ կլինի։
Նելլի Մելքոնյան
