04.05.2024 | 12:25
Արտարժույթների փոխարժեքները մայիսի 4-ի դրությամբ
Վարչապետի խոսնակը՝ աղմկահարույց լուսանկարի մասին
22.05.2020 | 12:48
Երեկ ֆեյսբուք սոցիալական ցանցում օգտատերերի կողմից ակտիվորեն քննարկվում էր Արցախի նորընտիր նախագահ Արայիկ Հարությունյանի երդմնակալությունից հետո արված մի լուսանկար: Լուսանկարում Հայաստանի վարչապետ Նիկոլ Փաշինյանը և մյուս բարձրաստիճան պաշտոնյաները սեղանի շուրջ են՝ առանց դիմակների ու ձեռնոցների:
Օգտատերերը քննարկում էին այն, որ երկրի բարձրագույն իշխանությունը՝ պարբերաբար կոչ անելով քաղաքացիներին պահպանել սոցիալական հեռավորություն և կրել պաշտպանիչ միջոցներ, հերթական անգամ հակառակ վարքագիծն է դրսևորում։
Թեմայի շուրջ Factor.am-ը պարզաբանում խնդրեց վարչապետի խոսնակ Մանե Գևորգյանից:
«Մինչև ընդունելությունը տեղի է ունեցել ԱՀ նախագահի երդմնակալության արարողությունը, որից առաջ և որի ժամանակ վարչապետը տիկնոջ հետ, Կառավարության և Ազգային ժողովի հրավիրյալները կրել են դիմակ, շատերը նաև ձեռնոց: Ընդունելության համար ընտրված է եղել բացօթյա տարածք, որպեսզի մասնակիցները կարողանան պահպանել սոցիալական հեռավորությունը: Տվյալ լուսանկարում ընդամենը մի պահ է, որ միմյանց շնորհավորել են»,- ասաց նա:
Հավելենք, սակայն, որ «ընդամենը մի պահ»-ն էլ բավարար է վարակվելու համար, և հաստատված համընդհանուր կանոնների պահպանումը պետք է լինի պարտադիր՝ առանց բացառությունների։ Առավել ևս, երբ խոսք է գնում ՀՀ և ԱՀ բարձրագույն իշխանությունների սոցիալական պատասխանատվության մասին։
Նարեկ Կիրակոսյան
