30.06.2026 | 22:04
Եվրոպայում շոգի նոր ալիք է սպասվում
Հայկական երկու պետությունների գոյությունը մեր ժողովրդի հարստությունն է. Արա Բաբլոյան
10.11.2017 | 14:24
Արա Բաբլոյանը բացման խոսքով է հանդես եկել Հայաստանի և Արցախի Ազգային ժողովների միջև համագործակցության միջխորհրդարանական հանձնաժողովի 12-րդ նիստի ժամանակ:
«Համոզված եմ, որ Հայաստանի Հանրապետության Ազգային ժողովի և Արցախի Հանրապետության Ազգային ժողովի միջև համագործակցության միջխորհրդարանական հանձնաժողովի հերթական նիստը նույն արդյունավետությամբ կշարունակի միջպետական ու միջխորհրդարանական օրակարգում գտնվող հարցերի քննարկումը և հայկական երկու պետությունների միջև միջխորհրդարանական կապերի զարգացումն ու ամրապնդումը:
Արցախ կատարած իմ վերջին այցից, որն ինձ համար առաջինն էր ՀՀ Ազգային ժողովի նախագահի պաշտոնում, պաշտոնական ու ոչ պաշտոնական հանդիպումներից, ստացած տպավորություններից համոզվեցի, որ Արցախի ժողովուրդը շարունակում է անվերապահորեն տնօրինել իր ճակատագիրը` նպատակաուղղված ընթանալով ընտրած ճանապարհով:
Մենք բազմիցս առիթ ենք ունեցել ասելու, որ Հայաստանի Հանրապետությունն Արցախի անվտանգության երաշխավորն է, սակայն Արցախի ժողովուրդն ինքն է իր ճակատագրի տերն ու տնօրինողը: Մեր դիրքորոշումը հստակ է՝ որևէ հարթակում կամ ատյանում, որևէ ձևաչափով չի կարող ընդունվել այնպիսի որոշում, որն անընդունելի կլինի Արցախի ժողովրդի համար կամ կսպառնա նրա անվտանգությանը: և Հայաստանի, և Արցախի հանրապետությունների իշխանությունները նախագահների մակարդակով բազմիցս են հայտարարել, որ արցախյան հակամարտության խաղաղ կարգավորումն այլընտրանք չունի:
Պետք է ճանաչվի ու հարգվի Արցախի ժողովրդի կողմից իր ապագան ազատորեն որոշելու իրավունքը և երաշխավորվի նրա անվտանգությունը: Արցախի գոյությունն ու կարգավիճակը Ադրբեջանի կազմում որևէ տարբերակով անհնարին և անընդունելի են: Շուրջ մեկ ամիս առաջ տեղի ունեցավ Հայաստանի և Ադրբեջանի նախագահների հերթական հանդիպումը, որը կարևոր քայլ էր բանակցային գործընթացի ակտիվացման համար: Սակայն բանակցություններում իրական առաջընթացի հասնելու համար Ադրբեջանը նախևառաջ պետք է հրաժարվի Արցախն անգամ տեսականորեն իր կազմում պատկերացնելու մտքից:
Մենք այսօր առաջին նիստն ենք անցկացնում Հայաստանում և Արցախում ընդունված սահմանադրական փոփոխություններից հետո: Սահմանադրության փոփոխություններն անհրաժեշտ են պետության ավելի արդյունավետ կառավարման և ժողովրդավարության մակարդակի բարձրացման համար: Հանրաքվեների արդյունքում Արցախում և Հայաստանում ընտրվել է զարգացման այն ճանապարհը, որը լավագույնս է համապատասխանում երկրի ներքին և արտաքին առանձնահատկություններին ու քաղաքացիների կարիքներին:
Անշուշտ, հետսահմանադրական գործընթացները Հայաստանում և Արցախում ունեն ընդհանրություններ ու առանձնահատկություններ: Այսօրվա բանախոսները, թերևս, ավելի մանրամասն կանդրադառնան այս հարցին:
: Մենք պարտավոր ենք պաշտպանել և զարգացնել այն` համատեղ ջանքերով ու գործողություններով, տնտեսական ու անվտանգության համակարգերի միասնական հզորացմամբ և ամրապնդմամբ: Համոզված եմ, որ այսօրվա մեր հանդիպումը կապերի ու հարաբերությունների սերտացման, տեղեկատվության փոխանակման, համատեղ գործողությունների ռազմավարությունն ու մարտավարությունը համակարգելու ևս մեկ հնարավորություն է, որը մենք կօգտագործենք արդյունավետ կերպով»:
