Իշխանության ազնիվ խոսքին չեմ հավատում, որ օրենքը չի միջամտում մարդու անձնական կյանքին. Ավետիք Իշխանյան. ՏԵՍԱՆՅՈՒԹ

Factor.am-ի հարցազրույցը իրավապաշտպան Ավետիք Իշխանյանի հետ

-Պարոն Իշխանյան, երեկ ամբողջությամբ ընդունվեց տեղորոշման և զանգերի ֆիքսման վերաբերյալ նախագիծը։ Ի՞նչ եք կարծում՝ սրա արդյունքում ինչ ենք ունենալու, հիմնական խնդիրը ո՞րն եք համարում։

-Նախ՝ կուզեի խոսել մի կարևոր արժեքի մասին, որը կոչվում է մարդու իրավունքներ։ Եվ Հայաստանը որդեգրել է այդ արժեքը. ժողովրդավարություն, իրավական պետություն, որոնցից ածանցվում են մարդու իրավունքները։ Իսկ մարդու իրավունքների հիմնական առանցքն անձնական կյանքն է, որին պետությունն իրավունք չունի միջամտելու։ Այդ արժեքն ընդունվում է այն երկրներում, որոնք որդեգրել են ժողովրդավարությունը։ Եթե ժողովրդավարական երկիր է, ապա ամեն դեպքում հասարակությունը չի վստահում պետությանը, այսինքն, չի վստահում, որ պետությունն իր անձնական կյանքին պետք է միջամտի։ Նա ընտրում է իշխանություն, ասում է՝ ես քեզ ընտրել եմ որոշ ժամանակով, բայց դու իրավունք չունես անելու այս, այս քայլերը։ Եվ հիմա այս օրենքը հակասում է այդ ամենակարևոր սկզբունքին։ Փաստորեն, այս օրենքով ես, քաղաքացին անընդհատ գտնվելու է պետության վերահսկողության տակ։ Չնայած իշխանությունը պնդում է, որ հեռախոսազանգերի բովանդակությունը չի վերահսկվելու, բայց ես իրավունք ունեմ չվստահելու նույնիսկ ամենաժողովրդավարական իշխանություններին։ Ես ի՞նչ երաշխիք ունեմ, որ այս տոտալ վերահսկողությունը չի լինելու իմ ցանկացած քայլի նկատմամբ։

-Իշխող ուժից ասում են, որ արտակարգ դրության այս պայմաններում սա անհրաժեշտ օրենք է և եթե ցանկանային հեռախոսազանգերի բովանդակությունը վեր հանել, դա կարող էին անել այլ միջոցներով, ոչ թե հրապարակային նախագիծ բերելով։

-Ես իրավունք ունեմ չհավատալ իշխանությանը։ Ի՞նչ երաշխիք ունեմ, որ նրանք ճիշտ են ասում։ Իշխանության ազնիվ խոսքի վրա՞ հավատամ. դրան որևէ մեկը չի հավատում։ Եթե հավատացողներ կան, դրանք հավատացյալներ են։ Ինձ համար բացարձակապես հաճելի չէ, որ անընդհատ զգամ, որ մի աչք ինձ հետևում է։

Մանրամասները՝ տեսանյութում:

Մերի Մարտիրոսյան