22.05.2026 | 23:50
Անդրանիկ Թևանյանի նկատմամբ հարուցվել է քրեական հետապնդում պետական դավաճանության հանցակազմի հատկանիշներով
Կոռուպցիայի կանխարգելման հանձնաժողովի ստացած առնվազն 8 դիմումից 2-ի հիմքով վարույթ է հարուցվել. Հայկուհի Հարությունյան
Հասարակություն
11.02.2020 | 14:32
Կոռուպցիայի կանխարգելման հանձնաժողովն արդեն երկու ամիս է՝ գործում է նոր կազմով, և որդեգրել է գործունեության նորարարական մոտեցումներ, որտեղ կարևորվում է նաև թափանցիկությունն ու գործունեության հաշվետվողականության մեխանիզմների պահպանումը: Այսօր լրագրողների հետ հանդիպմանը ներկայացնելով Կոռուպցիայի կանխարգելման հանձնաժողովի գործունեությունը՝ ասաց հանձնաժողովի նախագահ Հայկուհի Հարությունյանը:
Նա նշեց, որ երկու ամսվա ընթացքում Հանձնաժողովի գործունեությունը հիմնականում ուղղված է եղել գործունեության անհրաժեշտ իրավակարգավորումներին և տեխնիկական ապահովվածությանը, ինչպես նաև բովանդակային աշխատանքների իրականացմանը:
«Հանձնաժողովի աշխատանքների հիմքում ՀՀ կառավարության կողմից հաստատված հակակոռուպցիոն ռազմավարության մեջ նշված կանխարգելման ուղղությամբ ուղենիշեր հանդիսացող ուղղությունների հիման վրա հենց Հանձնաժողովի գործունեության ռազմավարության մշակման աշխատանքներն են: Հունվարի 31-ին արդեն ամփոփել ենք արդյունքները: Եվ, ի ուրախություն ու ի զարմանս մեզ, 70 և ավելի կազմակերպություններց, անհատներից և պետական գերատեսչություններից ստացել ենք հանձնաժողովի գործունեության ռազմավարության վերաբերյալ առաջարկներ»,- տեղեկացրեց Հայկուհի Հարությունյանը:
Կոռուպցիայի կանխարգելման հանձնաժողովի նախագահը նշեց, որ կարևորել են նաև քաղաքացիների հետ աշխատանքը. «Հասցեագրել ենք բոլոր այն դիմումները, որտեղ քաղաքացիները ներկայացրել են իրենց մտահոգություններն այս կամ այն ոլորտում առկա կոռուպցիոն ռիսկերի, արդեն տեղի ունեցած կոռուպցիոն երևույթների վերաբերյալ: Արդեն մեզ համար ձևավորել ենք նաև համակարգ, որտեղ արտացոլվի, թե քաղաքացիների կողմից անհանգստությունը, կարիքները, ինչպես նաև պահանջները կոռուպցիոն ռիսկերի նվազեցման և կոռուպցիան վերացնելու ուղղությամբ ինչ ոլորտների են վերաբերվում»:
Այս ընթացքում Հանձնաժողովը դիմումներ է ստացել նաև հայտարարագրերի սխալ լրացման, վարքագծի կանոնների խախտման և այլնի հետ կապված: Նման առնվազն 8 դիմումից 2-ի հիմքով վարույթ է հարուցվել:
«Ընդ որում՝ դրանցից 1-ը լրատվամիջոցների կողմից հրապարակված տեղեկատվության հիման վրա է եղել: Հանձնաժողովը պետական մյուս գերատեսչություններից անհրաժեշտ տեղեկատվություն է ստացել այդ վարույթների վերաբերյալ: Այդ ուղղությամբ աշխատանքն արդեն մոտենում է հանգուցալուծման, և շուտով կհրապարակենք հանձնաժողովի եզրահանգումը»,- նշեց Հարությունյանը:
Հանձնաժողովի անդամ Լիլիթ Ալեքսանյանն էլ ներկայացրեց հայտարարագրման ինստիտուտի շուրջ զարգացումները: Տեղեկացրեց, որ 2020 թվականը սկսելու են հայտարարագրերի նոր նմուշներով. Հանձնաժողովը դրանք մշակել է Արդարադատության նախարարության հետ, իսկ հունվարի 30-ին դրանք հաստատվել են Կառավարության կողմից:
Նոր հայտարարագրերով նախատեսվում է, որ, օրինակ, գույքի և եկամուտների հետ կապված գործարքներն ու գործողություններն արձանագրել ոչ թե հայտարարագրման օրվա դրությամբ, այլև գրանցել այդ գույքի հետ տարվա ընթացքում տեղի ունեցած փոփոխությունները, ինչպես նաև ֆինանսական հոսքերի փոփոխությունները, ինչպես նաև դրանց ծագման աղբյուրները: Սա, ի դեպ, վերաբերում է ոչ միայն պաշտոնատար անձին, այլև նրա ընտանքի անդամ համարվող անձանց վերաբերյալ տվյալներին:
