15.01.2025 | 16:47
Արդյո՞ք չեն հակասում ԵՏՄ-ի և ՀԱՊԿ-ի հանդեպ պարտավորություններին․ Կարասինը՝ ՀՀ-ԱՄՆ ռազմավարական գործընկերության փաստաթղթի մասին
Սևանա լճում ձկնային պաշարների նվազում կա․ Բարդուխ Գաբրիելյան
Տնտեսություն
13.12.2019 | 18:27
Այս տարի, նախորդ տարիների համեմատ, Սևանա լճում ձկնային պաշարների նվազում կա։ Այս մասին լրագրողների հետ հանդիպման ժամանակ ասաց ՀՀ ԳԱԱ Կենդանաբանության և հիդրոէկոլոգիայի գիտական կենտրոնի տնօրեն, կենսաբանական գիտ. դոկտոր, պրոֆ. Բարդուխ Գաբրիելյանը:
«Վերջին 4 տարվա ընթացքում մենք ունեինք սիգի պաշարների բարձրացում, բայց կարող էին ավելի լավ արդյունքներ լինել, եթե պատշաճ պահպանություն լիներ հատկապես ձվադրման ժամանակահատվածում։ Ոչ մի պահպանություն գոյություն չունի, ամենուրեք վաճառվում է սիգը և ձկնկիթը։ Մենք նախաձվադրային վտառը, եթե չպահպանենք, պարզ է, որ չենք ունենա ձուկ, որին անհրաժեշտ է պահպանել։ Իսկ նախարարությունը գնում է քայլի, որ բուն ձվադրող հատվածը միայն պահպանի։ Մենք առաջարկել էինք, որ այդ պահպանությունը, գոնե, սկսվեր դեկտեմբերի 1-ից, բայց, ցավոք սրտի, դա տեղի չունեցավ, և հիմա ձվադրող սիգի վտառի անխնա որս է իրականացվում»,- նշեց Բարդուխ Գաբրիելյանը։
Նա նկատեց, որ մյուս մեր կարևորագույն կենսառեսուրսը, որն արդյունագործական մեծ նշանակություն ուներ, խեցգետինն է։
«Երկար տարիներ մենք պնդել ենք, որ եթե անկառավարելի որս կատարվի, ապա մենք կունենանք նույն վիճակը, ինչ որ ունենք մեր արժեքավոր ձկնատեսակների դեպքում։ Այսօր մենք կանգնած ենք փաստի առաջ, որ Սևանա լճում ունենք խեցգետնի խզված պաշար»,- նշեց նա։
Վերջինս նաև տեղեկացրեց, որ իրենք նախարարությանը պետք է առաջարկեն, որ այս տարի խեցգետնի որսի վրա արգելք դրվի։
