10.12.2025 | 23:29
ԱՄՆ Կոնգրես է ներկայացվել 907 ուղղումն ամբողջությամբ չեղյալ համարելու մասին օրինագիծ
«Մեղավորը բռնարարն է» հանրային իրազեկման ակցիա՝ ընդդեմ կանանց նկատմամբ բռնության. ՈՒՂԻՂ
Հասարակություն
25.11.2019 | 12:04
Նոյեմբերի 25-ին աշխարհը նշում է կանանց նկատմամբ բռնության վերացման միջազգային օրը: Այս օրը մեկնարկում է նաև գենդերային պատկանելությամբ պայմանավորված բռնության դեմ ուղղված 16-օրյա արշավը, որն անցկացվում է ամեն տարի՝ նոյեմբերի 25-ից դեկտեմբերի 10-ը։ Այս տարի Ընդդեմ գենդերային բռնության 16-օրյակի առանցքում է սեռական բռնության և բռնաբարության խնդիրը։
Սեռական բռնությունը լրջագույն հիմնախնդիր է ինչպես Հայաստանում, այնպես էլ ամբողջ աշխարհում: Սեռական բռնության բոլոր տեսակները՝ մասնավորապես ոտնձգությունն ու բռնաբարությունն արմատավորված են հայրիշխանական ուժի և վերահսկողության բազմաշերտ համակարգում։ Բռնության այդ տեսակի մասին քիչ է խոսվում, սեռական բռնության դեպքերն առավելապես կոծկվում են՝ շարունակելով ստեղծել սոցիալական միջավայր, որում սեռական բռնությունը տարածված և նորմալիզացված է: Բռնաբարության և սեռական ոտնձգությունների ճշգրիտ թիվը դժվար է հստակեցնել, այդ հանցագործության տարածվածության և անպատժելիության, ինչպես նաև բռնաբարություն վերապրածների նկատմամբ խարանի պատճառով: Այնուամենայնիվ․
Համաձայն Առողջապահության համաշխարհային կազմակերպության՝ կանանցից յուրաքանչյուր չորրորդը ենթարկվում է սեռական բռնության՝ իր զուգընկերոջ կողմից, դեռահաս աղջիկների 1/3 խոստովանում է, որ իրենց առաջին սեռական հարաբերությունները եղել են պարտադրված:
Հայաստանում՝ 2019 թվականի առաջին 8 ամսվա ընթացքում ՀՀ ոստիկանության տվյալներով 73 դեպքով՝ իգական սեռի 74 ներկայացուցչի նկատմամբ կատարվել է սեռական ազատության և սեռական անձեռնմխելիության դեմ ուղղված հանցագործություն:
39 դեպքով՝ 40 անչափահասի նկատմամբ կատարվել է սեռական ազատության և անձեռնմխելիության դեմ ուղղված հանցագործություն, որոնցից 38 դեպքով՝ 39 անչափահաս աղջկա նկատմամբ։
Սեռական բռնությունն ունի խորքային ազդեցություն անձի ֆիզիկական և մտավոր առողջության վրա: Սեռական բռնության ենթարկված կանայք և անչափահասները ենթարկվում են հոգեբանական ճնշումների հասարակության կողմից, հաճախ նրանց են մեղադրում կատարվածի համար․ «միգուցե կնոջ վարքն այն չէր», «հագուստն էր կարճ», «օծանելիքն էր գրավիչ»։ Մինչդեռ, մեղադրելով սեռական բռնության ենթարկվածին, հասարակությունն արդարացնում է բռնարարին՝ այդպիսով կատարվածի պատասխանատվությունը բռնարարից տեղափոխելով սեռական բռնության ենթրակվածի վրա։
«Ընդդեմ կանանց նկատմամբ բռնության» կոալիցիայի կողմից գենդերային բռնության դեմ պայքարի մեկնարկն ազդարարող «Մեղավորը բռնարարն է» ակցիան ուղղված է բռնարարին։
Հասարակությունը պետք է փոխի իր վերաբերմունքը բռնարարի հանդեպ և միասին․ Ո՛Չ ԱՍԵՆՔ ԲՌՆՈՒԹՅԱՆԸ
