06.06.2026 | 13:05
Հայտնի է Հայաստանի հավաքականի հայտացուցակը Ղազախստանի դեմ խաղում․ ԼՈՒՍԱՆԿԱՐ
Շանթ Սարգսյանը՝ աշխարհի փոխչեմպիոն, Արթուր Դավթյանը՝ բրոնզե մեդալակիր
14.10.2019 | 12:46
ՀՀ կրթության, գիտության, մշակույթի և սպորտի նախարարությունից տեղեկացնում են, որ Հնդկաստանի Մումբայ քաղաքում ավարտվել է շախմատի աշխարհի Մ14, Մ16, Մ18 տարեկանների առաջնությունը: Հայաստանն առաջնությունում ուներ 8 ներկայացուցիչ, որոնցից 2-ը դարձել են մեդալակիրներ:
Մինչև 18 տարեկան տղաների պայքարում Հայաստանը ներկայացրել են գրոսմայստեր Շանթ Սարգսյանը և միջազգային վարպետ Արթուր Դավթյանը, որոնք դարձել են համապատասխանաբար արծաթե և բրոնզե մեդալակիրներ: Շանթ Սարգսյանը 8,5 միավորով զբաղեցրել է երկրորդ տեղը, իսկ Արթուր Դավթյանը 8 միավորով եզրափակել է լավագույն եռյակը: Այս տարիքային խմբում աշխարհի չեմպիոն է դարձել հնդիկ Ռամեշբաբու Պրագնանանդհան, որը վաստակել է 9 միավոր:
Մինչև 18 տարեկան աղջիկների պայքարում կանանց ՖԻԴԵ-ի վարպետ Աննա Խաչատրյանը վաստակել է 5,5 միավոր և զբաղեցրել 32-րդ հորիզոնականը:
Մ16 տղաների և աղջիկների տարիքային խմբերում Հայաստանն ունեցել է 2 ներկայացուցիչ՝ ՖԻԴԵ-ի վարպետ Մամիկոն Ղարիբյանն ու Սրբուհի Սարգսյանը: Ղարիբյանը զբաղեցրել է 29-րդ տեղը (6 միավոր), իսկ Սարգսյանը՝ 49-րդ (5 միավոր):
Մինչև 14 տարեկան տղաների խմբում Արսեն Դավթյանը զբաղեցրել է 24-րդ հորիզոնականը (6,5 միավոր), իսկ Ալեքս Սահակյանը`44-րդ (5,5 միավոր): Մ14 աղջիկների պայքարում Աստղիկ Հակոբյանը 7 միավորով զբաղեցրել է 12-րդ հորիզոնականը:
