ԱԺ հանձնաժողովը մերժեց «Ելք»-ի՝ ժամանակավոր հանձնաժողով ստեղծելու առաջարկը

Ազգային ժողովի արտաքին հարաբերությունների հանձնաժողովը 10 դեմ և 1 կողմ ձայների հարաբերակցությամբ մերժեց ընդդիմադիր «Ելք» խմբակցության՝ Ազգային ժողովի ժամանակավոր հանձնաժողով ստեղծելու առաջարկը: Ընդդիմադիր դաշինքն առաջարկում էր ժամանակավոր հանձնաժողովը ստեղծել, որն էլ կքննարկեր Եվրասիական տնտեսական միությանը Հայաստանի անդամակցության օգուտները և վնասները:

Հանձնաժողովի անդամները՝ բացառությամբ «Ելք» խմբակցության պատգամավոր Արտակ Զեյնալյանի, դեմ արտահայտվեցին Ազգային ժողովի ժամանակավոր հանձնաժողով ստեղծելու ընդդիմադիր խմբակցության առաջարկին:

Ի դեպ, հիմնական զեկուցող, Ազգային ժողովի ընդդիմադիր «Ելք» խմբակցության ղեկավար Նիկոլ Փաշինյանը մինչ հանձաժողով ստեղծելու անհրաժեշտությանն անդրադառնալը մանրամասնեց ներկայացրեց իրավիճակը, որն արձանագրվել է ԵՏՄ-ին՝ Հայաստանի անդամակցություից հետո:

«ԵԱՏՄ անդամակցության 3 տարում Հայաստանի ՀՆԱ-ն կրճատվել է 8%-ով, զբաղվածության մակարդակը՝ 13%-ով, միջազգային պահուստները` 40%-ով, պետական պարտքն աճել է 10%-ով, միաժամանակ ներդրումների զուտ հոսքերը 2014 թվականին կազմել են 167.4 մլրդ դրամ, իսկ 2016-ին դրանք նվազել են` հասնելով 81 միլիարդ դրամի»,- մանրամասնեց Փաշինյանը՝ արձանագրելով, որ և՛ քաղաքական, և՛ տնտեսական, և՛ ռազմաքաղաքական առումով Երվասիական տնտեսական միության կանխատեսվող սպառնալիքները մի կողմից, անարդյունավետությունը մյուս կողմից՝ արդարացվել են:

Ինչ վերաբերում է «Ելք»-ի ներկայացրած՝ ԵԱՏՄ-ից դուրս գալու մասին ԱԺ հայտարարության նախագծին, ապա դրա քննարկումը երկու ամսով հետաձգվեց, քանի որ հանձնաժողովի նիստին չէր ներկայացել հիմնական զեկուցող Էդմոն Մարուքյանը: