Թուրքիան Բաղդադի համաձայնության դեպքում միայն Քրդստանի դեմ ռազմական գործողություններ կսկսի

Թուրքիայի արտաքին գործերի նախարար Մևլութ Չավուշօղլուն թուրքական «24 TV» հեռուստաալիքի եթերում խոսել է Իրաքի Քուրդիստանում տեղի ունեցած հանրաքվեի մասին. փոխանցում է ermenihaber-ը:

Ելույթի ժամանակ Թուրքիայի արտգործնախարարը անդրադարձել է նաև այն հարցին, թե արդյոք թուրքական կողմը հանրաքվեից հետոՔուրդիստանի դեմ կնախաձեռնի ռազմական գործողություններ:

«Այն պահանջները և խնդրանքները, որոնք կգան Բաղդադից մենք կքննարկենք և ամեն տեսակի աջակցություն կտրամադրենք: Օրակարգում կա ամեն տեսակի համագործակցություն՝ այդ թվում համատեղ ռազմական գործողություններ: Բնական է, երբ աճող սպառնալիքների հարցում  համագործակցում ենք տարածաշրջանային երկրների հետ»,-ասել է  Չավուշօղլուն:

Վերջինիս խոսքերով՝ Իրաքի Քուրդիստանի ղեկավար Մասութ Բարզանիի գլխավոր նպատակը` որքան հնարավոր է երկար ժամանակ մնալ իշխանության գլխին և հենց դրանով է պայմանավորված անկախության հանրաքվեի անցկացումը: Թուրք պաշտոնյան համոզմունք է հայտնել, որ, եթե Քուրդիստանում ընտրություններ տեղի ունենաին, ապա Բարզանին կզրկվեր իշխանությունից:

Վերջինս նշել է, որ թեև Թուրքիան Իրաքի տարածքում  «Քուրդիստանի բանվորական կուսակցության» (ՔԲԿ-PKK) դեմ պարբերաբար ռազմական գործողություններ է իրականացնում, որի «իրավունքը ունի», այնուամենայնիվ նույնը հնարավոր չէ անել ներկայիս պայմաններում, առանց Իրաքի համաձայնության:

«Այլ երկրի ներսում ռազմական գործողություն իրականացնել կարողանալու համար , անհրաժեշտ է այդ երկրի հրավերը: Այս հարցում մենք բանակցում ենք Բաղդադի հետ»,-ասել է նա: