10.09.2026 | 17:01
1.45 մլրդ դրամ՝ Գյումրու թիվ 2 պոլիկլինիկայի հիմնանորոգման համար
Մեծ Բրիտանիան աջակցում է ԼՂ հակամարտության խաղաղ կարգավորմանն ուղղված Մինսկի խմբի համանախագահների ջանքերին
Քաղաքականություն
27.09.2017 | 15:21
Հայաստանն անցել է խորհրդարանական կառավարման համակարգի և այդ հարցում լավագույն փորձ է հանդիսացել նաև Մեծ Բրիտանիայի անցած ճանապարհը, ասել է ՀՀ ԱԺ նախագահ Արա Բաբլոյանը Միացյալ Թագավորության արտաքին գործերի և համագործակցության նախարարության Եվրոպայի և Ամերիկաների նախարար Ալան Դանքընի հետ հանդիպման ժամանակ:
Ալան Դանքընը կարևորել է երկու երկրների միջև առկա համագործակցությունը, խորհրդարանականների ակտիվ շփումներն ու փորձի փոխանակումը: Նա նշել է, որ Միացյալ Թագավորությունը դուրս է գալիս Եվրոպական միությունից, բայց ոչ երբեք Եվրոպայից:
Հայաստանի խորհրդարանում Ալան Դանքընը մասնակցել է «Միացյալ Թագավորություն և Հայաստան-խորհրդարանական ժողովրդավարության գործընկերներ» միջոցառմանը, պատասխանել հայ պատգամավորների հարցերին:
Նա հայտարարել է, որ Մեծ Բրիտանիան աջակցում է Լեռնային Ղարաբաղի հակամարտության խաղաղ կարգավորմանն ուղղված Մինսկի խմբի համանախագահների ջանքերին։
«Հակամարտության կարգավորումը կարող է հանգեցնել տարածաշրջանում մեծ տնտեսական առաջընթացի և կայունության», – ասել է նա:
Ալան Դանքընը նաև անդրադարձել է «ադրբեջանական լվացքատան» թեմային, նշելով, որ, եթե բրիտանացի պաշտոնյաների նկատմամբ կան մեղադրանքներ, ապա դրանք պետք է հետաքննվեն:
Միացյալ Թագավորության արտաքին գործերի և համագործակցության նախարարության Եվրոպայի և Ամերիկաների նախարարն այսօր այցելել է նաև Ծիծեռնակաբերդի հուշահամալիր:
