ԵՏՄ-ն ու ԵՄ-ն նույն զամբյուղի մեջ դնելը ինձ համար խնդրահարույց է․ Պյոտր Սվիտալսկի

Ես հավատում եմ, որ լավ կատարողական ունեցող Եվրոպական Միությունը օգտակար է անգամ «ասոցացման ուղի չընտրած» ՀՀ-ի համար։ Այս մասին «Հայաստանում եվրոպական միության մոդել-2017» երիտասարդական խորհրդաժողովի ժամանակ ասաց Հայաստանում ԵՄ պատվիրակության ղեկավար, դեսպան Պյոտր Սվիտալսկին։

Իր կողմից հնչեցված հարցին, թե որքան կարևոր է ԵՄ-ն Հայաստանի իշխանությունների համար, դեսպանը պատասխանեց։ «Ես կարծում եմ անհրաժեշտ է դիտարկել բոլոր կարևոր գործոնները, եթե նույնիսկ որոշ փաստաթղթերում արտացոլված չէ այնպես, ինչպես կցանկանայինք, որ այն լիներ»։

Դեսպանը որպես օրինակ մատնանշեց Կառավարության արտաքին քաղաքականության ծրագիրը։ Նկատենք, որ Հայաստան-ԵՄ հարաբերությունները, որպես արտաքին քաղաքականության գերակա ճյուղ, ծրագրում 19-րդն է։ Դեսպանը նկատեց՝ ԵՄ-Հայաստան հարաբերությունները բազմակողմ չեն, երկկողմ են: «Այն համաձայնագիրը, որը մենք պատրաստվում ենք ստորագրել, կլինի երկկողմ, ուստի նույն զամբյուղի մեջ ՄԱԿ-ը, ԵՏՄ-ն, ՀԱՊԿ-ը և ԵՄ-ն դնելը ինձ համար՝ որպես միջազգային հարաբերությունների գիտնականի, խնդրահարույց է»,- ժպտալով ասաց դեսպանը։

Պյոտր Սվիտալսկին հույս հայտնեց, որ առաջիկայում Հայաստանն իր հարաբերությունները ԵՄ-ի հետ ամբողջական կտեսնի։ Սվիտալսկին խոսեց նաև տնտեսական առումով Հայաստանի առաջնահերթ գործընկերներից, որոնք տեղ են գտել Կառավարության ծրագրում՝ ընդգծելով, թե իհարկե ցուցակում առաջինը ՌԴ-ն է։

Ինչ վերաբերում է ԵՄ անդամ երկրներին, օրինակ՝ Ֆրանսիան, Գերմանիան, ապա այդ երկրները 7-րդն են և 8-րդը, դեսպանը սակայն հիշեցրեց ԵՄ-ն նախորդ տարի ռեկորդային ներդրում է կատարել ՀՀում՝ 63 մլն եվրո։

Սեդա Ղուկասյան