19.03.2026 | 23:17
Էստոնիան մեղադրել է Ռուսաստանին օդային տարածքի խախտման համար
Վարչապետը մտահոգ է. գյուղատնտեսության ոլորտում աճ չի արձանագրվել
Տնտեսություն
22.09.2017 | 12:43
ՀՀ Կառավարության այսօրվա նիստում վարչապետ Կարեն Կարապետյանի հանձնարարականներից մեկը վերաբերում էր գյուղատնտեսության ոլորտին: Կարապետյանը հիշեցրեց, որ գյուղատնտեսությունը կառավարության կողմից ճանաչվել է տնտեսության գերակա ոլորտներից մեկը:
«Կառավարությունը շեշտը դնում է գյուղական համայնքների տնտեսական մեծ ներուժը բացահայտելու, անհրաժեշտ պայմաններ ապահովելու և դրանք արդյունավետ կերպով իրագործելու վրա»,- ասաց վարչապետը:
Կառավարության ղեկավարը նկատեց, որ վերջին ամիսներին գյուղատնտեսության ոլորտին վերաբերող վիճակագրական արդյունքներն իրենց մտահոգության տեղիք են տալիս, հետևաբար անհրաժեշտ է ոլորտում ձևավորվող համախառն արդյունքների հաշվառման վերլուծություն կատարել:
Հաշվի առնելով վերոնշյալը՝ վարչապետը հանձնարարեց գյուղատնտեսության և Տարածքային կառավարման և զարգացման նախարարներին, մարզպետներին, Ազգային վիճակագրական ծառայությանը երկու շաբաթվա ընթացքում ամփոփել և կառավարության աշխատակազմ ներկայացնել տեղեկատվություն գյուղատնտեսության ոլորտում արձանագրված ցուցանիշների վերաբերյալ, այդ թվում անդրադառնալ անկման պատճառներին:
Վարչապետի տեղեկացմամբ՝ այս տարվա հունվար-օգոստոսին նախորդ հունվար-օգոստոսի համեմատ բոլոր ոլորտերում արձանագրվել է աճ, բացի գյուղատնտեսությունից և շինարարությունից: «Ընդ որում, շինարարության թվերի դինամիկան մեզ ցույց է տալիս, որ մենք կոմպենսացնում ենք այդ հետ ընկնելը: Դրան գումարած այն հանձնարարությունները, որոնք մենք տվել ենք շինարարության ոլորտին, դրան գումարած քաղաքաշինական կոմիտեի նախագահի կանխատեսումները, մենք այդտեղ մեծ պրոբլեմներ չենք տեսնում: Գյուղատնտեսության ոլորտի հետ կապված մեզ պետք է թվերը ռեալ հասկանալ: Շատ ուշադիր անդրադառնում ենք դրան»,- եզրափակեց վարչապետը:
