30.04.2026 | 23:18
ՀՀ 4 քաղաքում մթնոլորտային օդում փոշու պարունակությունը գերազանցել է սահմանային թույլատրելի կոնցենտրացիան
Դատարանը երկարացրել է Աթամբաևի կալանքի ժամկետը
Քաղաքականություն
20.08.2019 | 11:32
Ղրղզստանի նախկին նախագահ Ալմազբեկ Աթամբաևի կալանքի ժամկետը երկարացվել է մինչև հոկտեմբերի 26-ը։ Այս մասին հայտնում է Pravda-ն՝ վկայակոչելով Աթամբաևի փաստաբան Սերգեյ Սլեսարյովին:
Դատական նիստը տեղի է ունեցել Ղրղզստանի Ազգային անվտանգության պետական կոմիտեի շենքում, որի կալանավայրում էլ օգոստոսի 8-ից գտնվում է Աթամբաևը։
Նախկին նախագահի փաստաբանը դատարանի որոշումն անօրինական է համարել և նշել, որ մտադիր է բողոքարկել այն:
Հիշեցնենք, որ օգոստոսի 7-ին մայրաքաղաք Բիշքեկից ոչ հեռու՝ Քոյ-Թաշ գյուղում գտնվող Աթամբաևի տան գրոհի ժամանակ հրաձգություն էր տեղի ունեցել։ Ղրղզստանի նախկին նախագահն ավելի ուշ խոստովանել է, որ ինքը ևս հրաձգության մասնակից է եղել։ Հատուկ նշանակության ջոկայիններին չէր հաջողվել Աթամբաևին միանգամից ձերբակալել. նախկին նախագահը միայն հաջորդ օրն էր հանձնվել։ Երկու օր տևած հրաձգության արդյունքում հատուկ նշանակության մեկ ջոկատային է զոհվել, 136 մարդ տուժել է:
Նշենք, որ 2011-2017 թվականներին Ղրղզստանը ղեկավարած Աթամբաևի դեմ պաշտոնավարման ժամկետի ավարտից հետո մի քանի քրեական գործ է հարուցվել՝ հիմնականում կոռուպցիոն հոդվածներով: Նախկին նախագահը, որն անցել է ընդդիմադիր ճամբար, այս տարվա հունիսին զրկվել է անձեռնմխելիությունից, ինչը նշանակում է, որ նա ցանկացած պահի կարող է քրեական պատասխանատվության ենթարկվել:
Նելլի Մելքոնյան
