18.10.2026 | 15:28
Հայաստանում ձմեռային զորակոչը կմեկնարկի նոյեմբերի 16-ին․ հայտնի են զորակոչի և զորացրման ժամկետները
ՌԴ ԿԸՀ-ն մեկնաբանել է Մոսկվայի Պետդումայի ընտրությունները հետաձգելու առաջարկը
Քաղաքականություն
12.08.2019 | 17:58
ՌԴ Կենտրոնական ընտրական հանձնաժողովը կքննարկի Մոսկվայի քաղաքային Դումայի ընտրությունները հետաձգելու հնարավորությունները, եթե դրա համար ծանրակշիռ պատճառներ լինեն: «Ինտերֆաքս»-ի փոխանցմամբ՝ այս մասին ԿԸՀ նախագահ Էլլա Պամֆիլովան հայտարարել է Business FM ռադիոկայանին տված հարցազրույցում:
Ավելի վաղ մոսկովյան Դումայի ընտրություններում չգրանցված թեկնածու Իլյա Յաշինը Պամֆիլովային կոչ էր արել ընդդիմության ներկայացուցիչներին թույլ տալ մասնակցել ընտրություններին և քվեարկությունը հետաձգել մինչև աշնան վերջ:
«Առայժմ միայն խոսակցություններ են այն մասին, որ պարզապես գրանցել եք նրանց, ովքեր ստորագրություններ չեն հավաքել, իսկ նրանց, ովքեր հավաքել են, չեք գրանցել: Բայց, հասկանո՞ւմ եք, դա լուրջ չէ: Եթե մենք փաստեր հավաքենք, լուրջ հիմնավորումներ, այդ դեպքում, բնականաբար, օրենքին համապատասխան մենք իրավիճակը կքննարկենք: Հիմա վաղաժամ է»,- հայտարարել է Էլլա Պամֆիլովան:
Նրա խոսքով՝ ԿԸՀ-ն դեռևս չի ավարտել գրանցման մերժումների հետ կապված բոլոր բողոքները:
Պամֆիլովան հիշեցրել է, որ բոլորին հրավիրել է Մոսկվայի քաղաքային Դումայի ընտրությունների հետ կապված ԿԸՀ-ի օգոստոսի 14-ի նիստին և խոստացել է ներկայացնել թեկնածուների գրանցման մերժման իրավաչափությանը վերաբերող ապացույցներ:
Իլյա Յաշինը, հիշեցնենք, որ Պամֆիլովային կոչ էր արել չեղարկել սեպտեմբերի 8-ին նախանշված մոսկովյան Դումայի ընտրությունները, ապահովել քվեարկությանն ընդդիմության ներկայացուցիչների մասնակցությունը և Մոսկվայի բնակիչներին վերադարձնել «ընտրության իրավունքը»: Յաշինը հիշեցրել է անկախ թեկնածուների օգտին օգոստոսի 10-ին անցկացված բազմամարդ հանրահավաքի մասին՝ հավելելով՝ արդյո՞ք «խելամիտ է անտեսել այդքան մարդկանց կարծիքը»:
