Տարածքներ՝ Ղարաբաղի միջանկյալ կարգավիճակի դիմաց` կնշանակի տարածքներ ոչնչի դիմաց. Վաղարշակ Հարությունյան

ՀՀ պաշտպանության նախկին նախարար Վաղարշակ Հարությունյանը Factor.am-ի հետ զրույցում, անդրադառնալով Հայաստան-սփյուռք համաժողովի ժամանակ ԱԳ նախարար Էդուարդ Նալբանդյանի ելույթին, համոզմունք է հայտնում, որ «երբեք հայկական կողմը չի գնա «տարածքներ՝ միջանկյալ կարգավիճակի դիմաց» տարբերակին»:

«Որովհետև եթե մենք գնում ենք դրան, հանձնում ենք տարածքներ, ստանում ենք այն, որ ռազմաքաղաքական հավասարակշռությունը փոխվում է հօգուտ Ադրբեջանի»,- ասում է պաշտպանության նախկին նախարարը՝ շարունակելով. «Ինչո՞ւ, որովհետև եթե մենք հանձնեցինք շրջաններ, կապ չունի՝ ինչ շրջաններ, ապա մենք երկարացնում ենք մեր շփման գիծը, դա կպահանջի ավելորդ ծախսեր Հայաստանի և Ղարաբաղի կողմից, զորքի քանակի, տեխնիկայի ավելացում»:

Ըստ Հարությունյանի՝ տարածքներ հանձնելու դեպքում հայկական կողմը կորցնում է այն դիրքերը, որոնք շահեկան են մեզ համար այսօր և ստանում մի նոր շփման գիծ, ինչը չի բխում Հայաստանի և Ղարաբաղի շահերից: «Դառնում են հասանելի Ղարաբաղի համարյա բոլոր շրջկենտրոնները: Եվ դա փոխում է բալանսը հօգուտ Ադրբեջանի: Եվ եթե Ադրբեջանը հիմա չի գնում կարգավիճակի հարցի լուծմանը, ապա երբ բալանսը փոխվի հօգուտ նրա, կգա՞, ի՞նչ եք կարծում»,- հարց է բարձրացնում Հարությունյանը՝ հավելելով. «Հայկական կողմը դա գիտակցո՞ւմ է, իհարկե գիտակցում է: Դրա համար այդպիսի մոտեցում չի կարող ձևավորվել»:

Նշենք, որ Հայաստան-սփյուռք համաժողովում արտգործնախարար Էդվարդ Նալբանդյանը մասնավորապես ասել է. «Խոսքը գնում է այն տարածքների մասին, որոնց վերադարձի դեպքում այս ամբողջ հիմնախնդրի կարգավորմանը և անվտանգության համակարգին վնաս չի հասցվելու և սպառնալիքի տակ չի դրվելու հանգուցալուծումը»:

Նալբանդյանը նաև հավելել է, թե «եռանախագահներն ասում են, որ Լեռնային Ղարաբաղի բնակչությունը պետք է ինքը որոշի իր ապագան ազատ կամարտահայտության միջոցով, որը պետք է ունենա միջազգային իրավական ուժ բոլորի համար: Մինչև այդ կամարտահայտության կազմակերպումը, վերջնական կարգավիճակի որոշման նպատակով, ԼՂ-ն պետք է ունենա միջանկյալ կարգավիճակ, սա նշանակում է, որ հետո կա նաև վերջնական կարգավիճակ»:

Ըստ Վաղարշակ Հարությունյանի՝ տարածքներ Ղարաբաղի միջանկյալ կարգավիճակի դիմաց՝ կնշանակի տարածքներ ոչնչի դիմաց: Ինչ վերաբերում է ԵՏՄ-ից դուրս գալու «Ելք»-ի նախաձեռնությանը, ապա Վաղարշակ Հարությունյանը «խաբեբայություն» է անվանում այն դժգոհությունը, որ Հայաստանը ԵՏՄ-ին անդամակցելով՝ տնեսական օգուտներ չի ստացել:

«Եթե Ռուսաստանը մեզ չաջակցեր, Հայաստանի ատոմակայանը կկանգեր ու երկրի տնտեսությունը կվերադառնար 1991-96 թվականների ցուրտ ու մութ տարիները: Եթե մենք ԵՏՄ-ից դուրս ենք գալիս, այդ մասին խոսողները պետք է հասկանան, որ ատոմակայանն էլ չի գործելու: Եվ եթե ասում են, թե մենք ոչ մի բան չենք ստացել ԵՏՄ-ից, դա ուղղակի խաբեբայություն է»,- պնդում է նախկին ՊՆ նախարարը:

Ավելին, ըստ Վաղարշակ Հարությունյանի, ՆԱՏՕ-ին ձգտող Վրաստանը անվտանգության որևէ երաշխիք չունի: «ՆԱՏՕ ձգտող մեր հարևանները ոչինչ չունեն, իսկ մեր հարաբերությունները ՆԱՏՕ-ի հետ նույն հարթությունում են, ինչ Վրաստանի և Ադրբեջանի հարաբերությունները»:

Մանրամասները դիտեք Factor.am-ի հետ ՀՀ պաշտպանության նախկին նախարար Վաղարշակ Հարությունյանի հարցազրույցում:

Մարինե Խառատյան