Ավարտվել են Սիրիայում անվտանգության գոտու վերաբերյալ թուրք-ամերիկյան բանակցությունները

Թուրքիայում ավարտվել են թուրք-ամերիկյան բանակցությունները Սիրիայում ստեղծվելիք անվտանգության գոտու պայմանների վերաբերյալ։ Այս մասին գրում է ermenihaber.am-ը։

Բանակցություներն ընթացել են Թուրքիայի պաշտպանության նախարարությունում։ Դրանք մեկնարկել էին օգոստոսի 5-ից։ Անվտանգության գոտու պայմանների վերաբերյալ ԱՄՆ-ի ու Թուրքիայի միջև առկա էին մի շարք անհամաձայնություններ, որոնց շուրջ բանակցելու նպատակով ԱՄՆ-ի պատվիրակությունը ժամանել էր Անկարա:

Ըստ Թուրքիայի պաշտպանության նախարարության գրավոր հայտարարության՝ 3-օրյա բանակցությունների արդյունքում հաջողվել է ընդհանոր հայտարարի գալ։

«1. Թուրքիայի անվտանգության հարցում ունեցած մտահոգությունները փարատելու նպատակով օր առաջ ձեռնարկել միջոցներ, որոնք պետք է կատարվեն առաջին փուլում:

2.Դրա շրջանակներում ԱՄՆ-ի հետ անվտանգության գոտու համակարգման և ղեկավարման համար Թուրքիայում կարճ ժամանակում ստեղծվելու է Համատեղ գործողությունների կենտրոն:

3. Այնուհետև, անվտանգության գոտին պետք է դառնա խաղաղության միջանցք և տեղահանված սիրիացիների վերադարձի համար պետք է ցանկացած լրացուցիչ միջոցներ ձեռնարկվեն»,-ասվել է հայտարարության մեջ։

Նշվել է նաև, որ անվտանգության գոտին «կվերածվի խաղաղության միջանցքի»։ Դրանից զատ ձեռնարկվելու են միջոցներ, որ սիրիացի փախստականները հետ վերադառնան։

Անվտանգության գոտու վերաբերյալ թուրք-ամերիկյան բանակցությունների մասին հայտարարություն է տարածել նաև Թուրքիայում ԱՄՆ-ի դեսպանատունը։ Հետաքրքրականն այն է, որ թե՛ ԱՄՆ-ի դեսպանատան, թե՛ Թուրքիայի ՊՆ-ի հայտարարության մեջ որևէ խոսք չի գնում անվտանգության գոտու սահմանների վերաբերյալ։