24.06.2026 | 23:56
Հրդեհ Վարդաշեն 6-րդ փողոցի շենքերից մեկում. մեկ անձ դիմել է բուժօգնության, տարհանվել է 12 քաղաքացի
Ինչո՞ւ են անտեսել «Ելք»-ին․ մանրամասներ «Հայաստան-Սփյուռք 6-րդ» համաժողովից
Քաղաքականություն
18.09.2017 | 12:51
«Ելք» խորհրդարանական խմբակցության ներկայացուցիչները հայտարարում են՝ «Հայաստան-Սփյուռք 6-րդ» համաժողովին չեն հրավիրվել, Սփյուռքի նախարարությունից էլ վստահեցնում են՝ Նիկոլ Փաշինյանի անունով հրավիրատոմս են ուղարկել խորհրդարան։ «Ելք» խորհրդարանական խմբակցության ղեկավար Նիկոլ Փաշինյանն ու նույն խմբակցության պատգամավոր Էդմոն Մարուքյանն իրենց ֆեյսբուքյան էջերում անդրադարձել են համաժողովին՝ հայտնելով, որ իրենց չեն հրավիրել։
«Երևանում կազմակերպում են համահայկական միջոցառում, որին չեն հրավիրում խորհրդարանական ընդդիմությանը, քանի որ մենք կարող ենք մերկացնել նրանց ողջ սնանկությունն ու ներկայացնել Հայաստանի զարգացման տարբերվող մոտեցումներ: Արդյունքում, իշխանությունները նույնիսկ մենաշնորհի են վեր ածել սփյուռքը` մոլորեցնելով սփյուռքի բազմաթիվ ներկայացուցիչների, կազմակերպելով համահայկական հավաք և դրանից դուրս թողելով իրենց նեղ շրջանակից դուրս գտնվողներին»,- իր ֆեյսբուքյան էջում գրել է Էդմոն Մարուքյանը։
Factor.am-ը Մարուքյանից հետաքրքրվեց, թե «Ելք»-ի կարծիքով միտումնավո՞ր չեն իրենց հրավիրել, ինչին Մարուքյանը զարմանքով պատասխանեց․ «Էդքան փոքր ո՞ւժ ենք, որ մոռանան»։ Սփյուռքի նախարարությունից փորձեցինք հասկանալ, թե ինչո՞ւ «Ելք»-ին հրավերներ չեն ուղարկվել, նախարարության լրատվական վարչությունից սկզբում ասացին, որ կփորձեն հստակեցնել, ապա ասացին, որ Նիկոլ Փաշինյանի անունով որպես խմբակցության ղեկավար հրավիրատոմս եմ ուղարկել խորհրդարան։
Հարցրեցինք՝ ինչո՞ւ բոլորի անունով չեն հրավիրատոմսերը եղել, նախարարության մամուլի խոսնակն ասաց, որ բոլորին չեն հրավիրել՝ ուղղակի ներկայացուցիչների: Նիկոլ Փաշինյանը հրաժարվեց հեռախոսով մեկնաբանություն տալ։ Զրուցեցինք նաև «Ելք» խմբակցության երրորդ ուժի՝ «Հանրապետություն» կուսակցության ներկայացուցիչ, ԱԺ պատգամավոր Արտակ Զեյնալյանի հետ, որը ևս ասաց՝ հրավիրատոմս «Հանրապետություն» կուսակցությունը չի ստացել։ Ինչ վերաբերում է այն հարցին, թե արդյոք տեղյա՞կ է Փաշինյանի անունով հրավիրատոմս ուղարկվել է խորհրդարան, այդ մասին Զեյնալյանը ոչինչ չգիտեր։ Խնդրի վերաբերյալ նախագահի մամուլի քարտուղարից չհաջոցվեղ մեկնաբանություն ստանալ․ վերջինս չպատասխանեց հեռախոսազանգերին, իսկ հասարակայնության հետ կապերի վարչության աշխատակիցը, լսելով հարցը, անջատեց հեռախոսը։
Սեդա Ղուկասյան
